पुष ०७, चितवन – तस्विर अंकित भगत । भरतपुर महानगरपालिका–३ का वडाध्यक्ष विकास थापाले नागरिकसँग जनप्रतिनिधिको सम्बन्ध नङ र मासु जस्तो हुनुपर्ने बताएका छन् । दर्शन मिडिया प्रा।लि।ले आइतबार लिटिल फ्लावर स्कुलमा आयोजना गरेको वडाअध्यक्षसँग विद्यार्थी (जनप्रतिनिधि र विद्यार्थीबिच अन्तरसंवाद) कार्यक्रममा बोल्दै वडाध्यक्ष थापाले यस्तो बताएका हुन् ।
‘वडाका जनप्रतिनिधिहरुको सम्बन्ध सम्पूर्ण वडावासी नागरिकहरुसँग जोडिएको हुन्छ’ वडाध्यक्ष थापाले भने, ‘यस्तो सम्बन्ध नङ र मासुको जस्तो हुनुपर्छ ।’ वडाध्यक्ष थापाले पहिलेपहिले जन्म दर्ता, मृत्यु दर्ता, विवाह दर्ता, सिफारिस आदिको काम गर्न नगरपालिका नै धाउनु पर्ने अवस्था रहेको तर अहिले यी सबै काम वडा कार्यालयबाटै हुने गरेकोले नागरिकलाई सहज भएको बताए ।
कार्यक्रममा बोल्दै वडा सदस्य एवं महानगर कार्यपालिका सदस्य सुकमाया परियारले विद्यार्थी भाइबहिनीसँग प्रत्यक्ष संवाद गर्न पाउँदा, विद्यार्थीका जिज्ञासाहरु सुन्न पाउँदा खुसी लागेको बताइन् । उनले सरसफाइको काम, विकासको काम निरन्तर भइरहने कुरा भएको विचार व्यक्त गरिन् ।
वडा सदस्य कमला बोलखेले विद्यार्थी र जनप्रतिनिधिबिचको अन्तरक्रिया कार्यक्रम वर्षको एकपटक राख्नु पर्ने सुझाव दिइन् । अर्का वडा सदस्य राम लोहनीले आगामी दिनमा यस्ता कार्यक्रमलाई निरन्तरता दिनु पर्ने बताए । कार्यक्रममा निकै राम्रा कुरा उठेको उनको भनाइ थियो । वडा सदस्य माधव अर्यालले कार्यक्रममा विद्यार्थीहरुबाट वातावरण, सरसफाइलगायत विविध प्रश्न आएको बताए ।
कार्यक्रममा भरतपुर महानगरपालिका वडा नम्बर ३ भित्र रहेका चमेलीदेवी पिया राष्ट्रिय मावि, लिटिल फ्लावर स्कुल, सिद्धार्थ इंग्लिस सेकेन्डरी बोर्डिङ स्कुल, सेन्ट्रल इंग्लिस स्कुल, भृकुटी बोर्डिङ स्कुल र मुनलाइट बोर्डिङ स्कुलका विद्यार्थीहरु र प्रतिनिधि शिक्षक एवं वडा सचिव माधव सुवेदीको सहभागिता रहेको थियो । वडा सचिव सुवेदीले वडाले दिने सेवा सुविधाको बारेमा स्पष्ट पारेका थिए। कार्यक्रममा व्यवस्थापकीय भूमिका निर्वाहा गरेको लिटिल फ्लावर स्कुलका प्रिन्सिपल फादर मन्जुस एस जे र पत्रकार एवम् प्राध्यापक मधुसुदन दवाडीले यस्ता कार्यक्रमले विध्यार्थीमा स्थानीयप्रतिको जानकारी र विश्वास बढ्ने बताएका थिए।
दर्शन मिडियाका कार्यकारी निर्देशक प्रकाशमणि ज्ञवालीको अध्यक्षतामा कार्यक्रम सम्पन्न भएको थियो । कार्यक्रमका लागि वडा नम्बर ३ को कार्यालयले आर्थिक सहयोग गरेको थियो ।कार्यक्रम पत्रकार अजिता अधिकारीले संचालन गर्नुभएको थियो । कार्यक्रममा करिव चार सय विध्यार्थी सहभागी थिए।
