समाचार

भरतपुर,२ कार्तिक ।
पवित्रा ढकाल ।

तस्विर : कोमल चन्द्र भगत
क्लिनिक नेपाल फ्रेण्डसीप स्काउटद्धारा आयोजित ३ दिने चौथो जंगल क्याम्पको बुधबार पश्चिम चितवनको मेघौलीमा उद्धघाटन उद्घाटन गरिएको छ । भरतपुर महानगरपालिका वडा नं २७ मा रहेको क्लिनिक नेपाल स्काउट र वेलायतको व्रिस्टोल स्काउट ट्रुप द्धारा आयोजित जंगल क्याम्पमा नेपाली र वेलायत गरी २७५ भन्दा बढि विद्यार्थीहरुको सहभागीता रहेको छ । चितवन र नवलपुर लगायतका संस्थागत र सामुदायिक विद्यालय वाट २५० जना विद्यार्थीहरु र बेलायतको ब्रिस्टोल शहरबाट ३५ जना विद्यार्थी सहभागी भएका छन् । ३ दिन सम्म चल्ने जंगल क्याम्पमा विद्यार्थीहरु विभिन्न साहसीक क्रियाकलाप, संस्कृति आदान प्रदान, जैविक विविधता संरक्षण र जलवायु परिवर्तनले पारेको असरका विषयमा अनुभव आदान प्रदान गर्नेछन् । क्लिनिक नेपालको आयोजनामा भएको स्काउट जंगल ज्याम्वोरी प्रमुख अतिथि भरतपुर महानगरपालिका का उप प्रमुख चित्रसेन अधिकारीले गर्नुभएको हो । कार्यक्रममा विशिष्ट अतिथिहरुमा भरतपुर महानगरपालिका शैक्षिक प्रशासन महाशाखा प्रमुख महेन्द्र पौडेल, भरतपुर महानगरपालिका वडा नं २६ का वडा अध्यक्ष ज्ञान प्रसाद खनाल, वडा नं २७ का वडा अध्यक्ष राम महादुर भण्डारी, जानकी मा.वि. का प्रधानाध्यापक दुर्गा प्रसाद सापकोटाको उपस्थिति रहेको थियो । स्काउटको पोशाकमा सजिएका विद्यार्थीहरुले अतिथीहरुको स्वागत गरेको थिए । भरतपुर महानगरपालिका वडा नं ३ मा रहेको लिटिल फ्लावर स्कुलका विद्यार्थीहरुको बेण्ड वाजा वाट प्रमुख अतिथि लाई स्वागत गरिएको थियो । स्वागत मन्तव्य स्काउटर सोजीता भण्डारीले गरेकी थिइन् । उद्धघाटन कार्यक्रममा प्रमुख अतिथि र विशिष्ट अतिथीहरुले धार्मिकरुपले नामाकरण गरिएका ११ वटा वृक्षको रोपण गरेका थिए भने एउटै पोलमा तिनवटा झण्डा उत्तोलन गरि नयां तरिकाले कार्यक्रमको उद्धघाटन गरिएको थियो । व्रिटिस नागरिक डियन मिलेटियड, जानकी माविका प्रधानाध्यापक दुर्गा प्रसाद सापकोटा, वडा अध्यक्षहरु राम वहादुर भण्डारी, ज्ञान प्रसाद खनाल, शैक्षिक प्रशासन महाशाखाका प्रमुख महेन्द्र पौडेल, व्रिटिस नागरिक तिन जना, प्रमुख अतिथि भरतपुर महानगरपालिका का उप मेयर चित्रसेन अधिकारीले स्काउटका विद्यार्थीको आगमनले भरतपुर भ्रमण वर्ष २०२४ सफल पार्न सहयोग पुग्ने बताएका थिए । कार्यक्रममा स्काउटर विद्यार्थीहरु वाट स्काउट गितमा नृत्य प्रस्तुत गरिएको थियो । तिन दिनको वसाइमा वेलायतका स्काउट विद्यार्थी तथा नेपालका स्काउट विद्यार्थीहरु विच अन्तरकृया तथा मित्रताको भावनाको विकास हुने गरी कार्यक्रम आयोजना गरिएको आयोजक हरी वहादुर भण्डारी बताए । जंगल क्याम्प अवधिभर विभिन्न खेलहरुपनि समावेस भएका छन् जसले विद्यार्थीहरुको क्षमता तथा अनुशासित वनाउने आयोजक सुमन पौडेलको भनाइ छ। कार्यक्रम भरतपुर महानगरपालिका का स्काउट सँयोजक शिव प्रसाद वराल र स्काउटर उत्सवले सञ्चालन गरेका थिए । कार्यक्रम क्लिीनिक नेपालका संस्थापक अध्यक्ष एवं भरतपुर महानगरपालिका वडा नं. २७ का वडा अध्यक्ष हरी वहादुर भण्डारीको अध्यक्षतामा भएको थियो ।

२९ असोज, चितवन ।तस्विर : कोमल चन्द्र भगत ।

चितवनको पर्यटकिय नगरी सौराहामा ‘सिद्धार्थ भिलासा वनबास’ रिसोर्ट आइतवारदेखि सञ्चालनमा आएको छ । घटस्थापनाको अवसर पारेर सञ्चालनमा ल्याइएको रिसोर्ट भिलासा सिद्धार्थ ग्रुपको लक्जरी ब्राण्ड हो । सुरुमा स्थानीय व्यवसायी बासु ढुंगानासहितको टिमले निर्माण गरेको रिसोर्टमा पछि सिद्धार्थ समूह मिसिएर व्यवस्थापन सहितको जिम्मेवारी लिएको छ । ४५ करोड लगानीमा बनेको भनिएको रिसोर्टमा २२ भिल्लामा ३४ कोठा रहेका छन् । परम्परागत काठ र माटो प्रयोग गरी बनाइएका कोठाहरू चराका नामबाट नामकरण गरिएका छन् । १० वटाभन्दा बढी कोठा अपाङ्गमैत्री छन् । होटल अपांगता भएकाहरुको लागि बनेको रहेछ भन्ने बुझाउनको लागि अपांगमैत्री कोठा बनाइएको वनबास चितवन प्रालिका अध्यक्ष बासु ढुंगानाले बताउनुभयो । कन्फ्रेन्स हल र रेष्टुरेन्टमा उनीहरू सजिलै जानसक्ने ¥याम बनाइएको उहांको भनाइ छ । होटलमा दुईवटा हलहरु छन् । एउटामा ८० देखि १०० जनासम्म र अर्कोमा ३० देखि ५० जनासम्म अट्ने क्षमताका छन् । रिसोर्ट सौराहा बजारबाट तीन किलोमिटर पश्चिममा छ । जंगलको बीचमा रहेको यो रिसोर्टका संरचनामा नेपालको प्राचिन कला संस्कृति झल्किने गरी आकर्षक कला कुँदिएको छ । यहाँ बस्न आउने विदेशी पर्यटकका लागि दुई रात तीन दिनको प्याकेजका लागि २५० देखि ४ सय डलरसम्म शुल्क राखिएको छ । नेपाली पर्यटकको जोडीलाई भने एक रात बसेको र बिहानको ब्रेक फास्टसहित दश हजार रुपैयाँसम्म लिने रिसोर्टले जनाएको छ । रिसोर्ट ३ बिघा क्षेत्रफलमा फैलिएको छ । पाहुनाले रिसोर्ट परिसरकै तलाउमा माछा मार्न सक्नेछन् । विभिन्न प्रजातिका चराहरुले खाने फल लाग्ने ५० भन्दा बढी प्रजातिका विरुवाहरू रिसोर्टको डिलमा हुर्काइएको छ । सौराहाको हात्तीसार नजिकै भएकाले कोठाहरुबाट हात्ती देख्न सकिन्छ । चितवन राष्ट्रिय निकुञ्जको नजिकै रहेको रिसोर्टले जिप सफारी, हात्ती सफारी, बोट सफारी लगायतका गतिविधि पनि गराउने जनाएको छ । रिसोर्टमा स्विमिङ पुल, मसाज सहितको स्पा पनि रहनेछ । सिद्धार्थ हस्पिटालिटीका प्रमुख कार्यकारी अधिकृत कृष्ण न्यौपानेले रिसोर्ट स्थापनासँगै देश तथा विदेशबाट बुकिङ गर्नेक्रम सुरू भएको बताउनुभयो । होटलको चेन बिजनेस भएकाले पर्यटकलाई प्याकेज सुविधा दिन सकिने उहांको भनाइ छ ।

सिद्धार्थ ग्रुपले देशका विभिन्न भागमा सुविधा सम्पन्न होटल तथा रिसोर्टहरु सञ्चालन गरेको छ । भैरहवामा साढे २ अर्ब रूपैयाँ लगानीमा पाँचतारे होटल सिद्धार्थ भिलासा सञ्चालनमा ल्याएको जनाएको छ । यही समूहले नेपालगञ्ज र सुर्खेतमा चारतारे सिद्धार्थ होटल तथा कपिलवस्तुको चन्द्रौटामा ‘सिद्धार्थ लुम्बिनी ग्रीन रिसोर्ट’ सञ्चालन गरिरहेको छ । चिसापानीमा सिद्धार्थ रिसोर्ट र पृथ्वी राजमार्ग अन्तर्गत चुम्लिङटारमा सिद्धार्थ रिभरसाइड रिसोर्ट पनि रहेका छन् । बौद्धको सिद्धार्थ बुटिक होटल, बिर्तामोडको चार तारे सिद्धार्थ होटल ग्राण्ड सिटी, नुवाकोटको सिद्धार्थ होटल वाटर टावर, टिकापुरको होटल सिद्धार्थ, सुन्धाराको होटल सिद्धार्थ यसै ग्रुप अन्तर्गतका होटल हुन् । बुटवल, नेपालगञ्ज, तीनकुने, घोबिघाट र पुरानो बानेश्वरमा पनि सिद्धार्थ कटेज सञ्चालनमा छन् ।

हेटौंडा, असोज २७ । 

प्रेस चौतारी नेपाल बागमती प्रदेश कमिटीले नेपाल पत्रकार महासंघ बागमती प्रदेश कमिटीको कार्यालयमा तालावन्दी गरेको छ । पत्रकार महासंघ केन्द्रीय समिति अन्तर्गतको सदस्यता शुद्धीकरण समितिले प्रदेश समितिबाट प्राप्त सिफारिस भनी प्रकाशित गरेको नामावलीप्रति प्रेस चौतारी नेपाल बागमती प्रदेश कमिटीको गम्भीर ध्यानाकर्षण जनाउँदै तालावन्दी गरेको हो । प्रेस चौतारी बागमती प्रदेश कमिटीका कार्यबाहक अध्यक्ष राधेश्याम खतिवडाको नेतृत्वमा प्रेस चौतारीका केन्द्रीय सदस्य हरि हुमागाई, चौतारी बागमती प्रदेश कमिटीका महासचिब र सदस्यहरु, चौतारीका जिल्ला अध्यक्ष बालकृष्ण अधिकारी लगायतकाले महासंघको कार्यालयमा अनिश्चित कालका लागि तालावन्दी गरेका हुन् । महासंघमा नेतृत्वमा रहनेहरु र पदाधिकारीहरुले आफ्नो संगठन निकट निष्कृय पत्रकारहरुको सदस्यता नवीकरण गर्ने तर प्रेस चौतारीमा आस्था राख्ने क्रियाशिल पत्रकारहरुको सदस्यता नवीकरण नगर्ने गरी प्रदेशबाट सिफारिस भएको नामावली क्रियाशिल पत्रकारहरुलाई सदस्यताबाट वञ्चित गर्ने मनसाय रहेको प्रेसचौतारीले ठहर गरेको छ ।

नेपाल पत्रकार महासंघ बागमती प्रदेश समितिले सदस्यताको विषय टुंग्याउनु अघि संगठनहरुसँग बसेर गरेको सहमति लत्याएको छ । चौतारीसंग गरेको सहमतिको प्रयास गरिएको प्रपञ्च रचेर आफ्नो मनोगत निर्णय कार्यान्वयन गराउन सिफारिस गर्ने नेपाल पत्रकार महासंघ बागमती प्रदेश समितिको सिफारिसको घोर बिरोध रहेको कार्यबाहक अध्यक्ष खतिवडाले बताए ।

जिल्ला समितिबाट सर्वसम्मत सहमति भई सदस्यता नवीकरण गर्न सिफारीस गरिएका पत्रकारहरुको नामावली काटेर जिल्लाबाट सिफारिस नभएकाहरुको नाम प्रदेश समितिबाट थप्ने कार्य भएको छ । केन्द्रीय समितिबाट जारी भएको मापदण्डलाई धुलीसात बनाउँदै प्रदेश समितिले मनोगत रुपमा गरेको सिफारिस कार्यान्वयन नगर्न चौतारीले केन्द्रीय समितिको ध्यानाकर्षण गराएको छ ।

प्रेस चौतारी नेपालको सदस्य भएकै कारण क्रियाशिल पत्रकारलाई नयाँ सदस्यता नदिने र सदस्यता नवीकरण नगर्ने महासंघ प्रदेश समितिका नेतृत्वले राजनीतिक आस्थाका आधारमा खल्तीका व्यक्तिलाई नयाँ सदस्यता पनि दिने, निष्कृय पत्रकारहरुको नवीकरण पनि गर्नेगरी रचिएको षडयन्त्र प्रेस चौतारी नेपाल बागमती प्रदेश कमिटीलाई कुनै हालतमा स्वीकार्य नभएको तालावन्दी पछी जारी बिज्ञप्तीमा उल्लेख छ । महासंघबाट जारी भएको १५ बुँदै मापदण्ड पूर्ण पालना नभएसम्म ताला नखुल्ने प्रेसचौतारीले जनाएको छ ।