समाचार

चितवन, माघ ८ ।

चितवन राष्ट्रिय निकुञ्जको सिसुवार क्षेत्रमा एक गैंडाको बच्चा मृत फेला परेको छ । गैंडाको बच्चा प्राकृतिक कारणले मरेको चितवन राष्ट्रिय निकुञ्जका सुचना अधिकारी गणेश प्रसाद तिवारी जानकारी दिएका छन् । । सुचना अधिकारी तिवारीका अनुसार ‘गैंडाको बच्चा मरेको अवस्थामा भेटिँदा माउ पनि सँगसँगै थियो, मरेको बच्चाको माया लागेर होला साथ छाडेको थिएन, ‘हाम्रो टोली घटनास्थलमा पुगेपछि छाड्यो ।तिवारीले भनेका छन् ।’

बच्चा गैंडा के कारणले मरेको हो भनेर पोष्टमार्टम रिपोर्ट आएपछि मात्रै थाहा हुने तिवारीले बताए । निकुञ्जको कावासोती क्षेत्रमा माघ ६ गते गैंडाका आमाछोरा तस्करहरूले मारेको पर्सिपल्ट नै गैंडाको बच्चा मरेको हो । चालू आर्थिक वर्षमा योसहित ११ गैंडा मरेका छन् । ती मध्ये ३ गैंडा चोरी शिकारीले मारेका हुन् ।

माघ ७, चितवन । साङ्ग–बिराट्–श्री गायत्री कोटिहोम ज्ञान महायज्ञको लागि नारायणी नदी किनारमा हवन मण्डप र पञ्च कुण्ड बनाउने काम थालिएको छ । माघ १२ गते वसन्त पन्चमीदेखि फागुन १२ गते सम्म नदी किनारमा हुन लागेको ज्ञान महायज्ञको तयारीका लागि हवन मण्डप र कुण्ड बनाउन लागिएको हो ।
निर्माणधीन कुण्डको शुक्रबार महायज्ञका संरक्षक महेश सन्यास आश्रमका पिठाधिस १००८ स्वामी रमाणानन्द गिरीजीमहाराज र गण्डकी–नारायणी महाआरती परिषद्कावरिष्ठ सल्लाहकार टंकनाथ पौडेल लगायतले निरीक्षण गरेका छन् ।
ब्राह्मणलाई खानपिन तथा आवास र यज्ञको लागि आवश्यक पर्ने हवन कर्ताको व्यवस्था गर्ने कार्य अन्तिम चरणमा पुगेको महायज्ञ संयोजक एवम् श्रीगण्डकी–नारायणी संरक्षण महाआरती परिषद्का अध्यक्ष प्रेम निधिभारद्धाज कँडेलले जानकारी दिए । उनका अनुसार चरु (हवन सामाग्री) संकलन गर्ने कार्य पनि सुरु भइसकेको छ । विभिन्न आमा समूहहरुले चरु संकलन गर्दै छन् । हवन गर्न आवश्यक पर्ने तिल, जौ, घ्यु, सखर, चामललाई चरु भन्ने गरिन्छ ।
‘यज्ञको तयारी युद्धस्तरमा अघि बढेको छ । दुई÷तीन दिनभित्रै हवन मण्डप र पञ्च कुण्ड तयार भइसक्छ’, उनले भने । हवन कुण्डको बाहिरी घेरामा फलामका डण्डि गाडेर हवन मण्डप बनाउने काम भइरहेको छ ।कोटिहोम ज्ञान महायज्ञमा ब्राह्मणहरुले एक महिनामा एक करोड ४९ लाख ८५ हजार पटक गायत्रीमन्त्र जप गर्नुपर्छ । लाखौँ भक्तजन महायज्ञमा आउने विश्वास लिइएको छ ।
योगी नरहरीनाथले शरिर छाडेपछि पहिलो पटक ब्रह्मगायत्री मन्त्रद्धारा हवनहुनलागेको हो । ‘यो एक युगमाहुने हवनहो । यसै क्षेत्रमा आरती गर्दै आएको संस्थाले महायज्ञ गर्न लागेको हो । चरु संकलनका लागि धेरै भन्दा धेरै आमा समूहलाई परिचालन गरिएको छ । प्रचार प्रसारलाई पनि हामीले तीव्र बनाएका छौँ’, उनले भने ।
श्री सनातन संस्कृति संरक्षण अभियान र श्रीगण्डकी–नारायणी संरक्षण महाआरती परिषद्को संयुक्त आयोजनामा ज्ञान महायज्ञ हुन लागेको हो ।सनातनदेखि चलिआएको संस्कृति, परम्परा, नदी संरक्षण, पयार्वरणीय सन्तुलन जोगाउने उद्धेश्यले कोटिहोम ज्ञानमहायज्ञ गर्न लागिएको कँडेलले जानकारी दिए । नेपालमा कोटिहोम महायज्ञका अध्येता, संकल्पकर्ता, राष्ट्र गुरु योगी नरहरिनाथलाई सम्झदै कोटिहोम ज्ञानमहायज्ञ गर्न लागिएको उनले बताए । कोटिहोमको दर्शन गर्न पाउनु मात्रै पनि महत्वको विषय भएको उनको भनाइ छ ।
नेपाल सन्त समाजका अध्यक्ष स्वामी ज्ञानानन्द सरस्वती महाराजको प्रमुख संरक्षकत्वतथा महामण्डलेश्वर आत्मानन्दगिरी, रमणानन्द गिरी, स्वामी जगन्नाथाचार्य, हरिशरण उपाध्याय, किशोरकुमार गौतम आदि नेपालका प्रमुख सन्तमहात्माहरूको संरक्षकत्वमा महायज्ञ हुने आयोजकले जनाएको छ ।

चितवन, माघ ७

चितवनका प्रमुख जिल्ला अधिकारी आशमान तामाङ गृह मन्त्रालयमा तानिएपछि सुरेन्द्र पौडेललाई चितवनको प्रमुख जिल्ला अधिकारीको जिम्मेवारी दिइएको छ । उपप्रधान तथा गृहमन्त्रीस्तरीय निर्णयानुसार उनीहरुको सरुवा भएको हो । त्यस्तै उनीहरु सहित सरकारले एकै पटक ४२ जना प्रमुख जिल्ला अधिकारी र ७ जना सहायक प्रमुख जिल्ला अधिकारीसहित ७० जना सहसचिव र उपसचिवको सरुवा गरेको हो । उपप्रधान तथा गृहमन्त्रीस्तरीय निर्णयानुसार सबै सहसचिव र उपसचिवहरूलाई काज सरुवा गरिएको छ । सरुवा हुनेमा सिडिओ, सहायक सिडिओका साथै जेलर, निर्देशकसम्म रहेका छन् ।