समाचार

बैशाख ५, रत्ननगर । तस्विर ः कोमल चन्द्र भगत । २९औं वन्यजन्तु सप्ताह अन्तर्गत बुधबार बुढिराप्ती नदी सरसफाई गरिएको छ । बाघमारा मध्यवर्ती सामुदायिक वन उपभोक्ता समुहको आयोजनामा चित्रसारी पुलदेखि डुंगाघाट सम्म सरसफाई गरिएको वनका अध्यक्ष जीतु तामाङले जानकारी दिए । सरसफाई कार्यक्रमको रत्ननगर नगरपालिका वडा नं ७ का वडाध्यक्ष सजना महतोले उद्घाटन गरेका थिए । सो अबसरमा उनले वाताबरण र प्रकृति संरक्षणको हिसाबले नदी प्रदुषण रोक्नु पर्ने बताए । नदी प्रदुषण हुँदा गाही लगायत नदीमा आश्रित प्राणी संकटमा परेको भन्दै उनले नदीमा मानवीय चाप घटाउनुपर्नेमा जोड दिए । कार्यक्रममा मृगकुञ्ज मध्यवर्ती उपभोक्ता समितिका अध्यक्ष दुर्गाप्रसाद घिमिरेले संरक्षणको दृष्टिकोणले महत्वपूर्ण मानिएको वन्यजन्तु सप्ताहप्रति निकुञ्ज र सौराहाका व्यवसायीहरुले बेवास्था गरेको भन्दै असन्तुष्ट व्यक्त गरे । वन र वन्यजन्तु देखाएर लाभ लिएका सौराहाका व्व्यवसायी र संरक्षणको जिम्मेवारी लिएका निकुञ्जका अधिकारीहरुले सप्ताहलाई नगर अन्दाज गरेको भन्दै अध्यक्ष घिमिरेले यस्तै प्रवृति हावी भए समुदायले संरक्षणको दायित्व बहन नगर्ने चेतावनी दिए । संरक्षण समुदायको मात्र ठेक्का हो उनले भने निकुञ्ज र व्यवसायीले चासो लिनुपर्दैन । चित्रसेन मध्यवर्ती सामुदायिक वन, सौराहा लेडी जेसीज, लियो क्लब अफ चितवन सौराहा, मैनहा यूवा क्लवको सहयोगमा आयोजित कार्यक्रममा सहभागी संरक्षणकर्मीहरुले नदी र नदी किनारमा जथाभावी फालेका प्लाष्टिक तथा सिसाजन्य फोहोर संकलन गरी व्यवस्थापन गरिएको थियो ।

कार्यक्रममा बाघमारा वनका अध्यक्ष तामाङले वन जोगाए बापत बाघमाराले समुदाय केन्द्रीत कार्यक्रम गरिरहेको भन्दै पछिल्लो समय गरिवी निबारणका लागि गतिविधि सञ्चालन गरिरहेको बताए । वर्ड एजुकेशन सोसाइटीका अध्यक्ष टीकाराम गिरीले निकुञ्ज आसपासका नदीहरुमा मानवीय चापका कारण जलचर प्राणी संकटमा परेको बताए । वनकी सदस्य सरस्वती चालिसेको अध्यक्षतामा भएको कार्यक्रममा टिकौली मध्यवर्ती सामुदायिक वनका कार्यबहाक अध्यक्ष टीकाराम गिरी, सरसफाई अभियान्ता ज्ञानेन्द्रराज पाण्डे, सौराहा लेडी जेसीजकी सुस्मिता न्यौपाने, लियो क्लव अफ चितवन सौराहाका अध्यक्ष संजय पौडेल लगायतको उपस्थिति रहेको थियो ।

सप्ताह अन्तर्गत बैशाख ६ गते वन,वन्यजन्तु र बाताबरण संरक्षणमुलक सचेतना रयाली, सप्ताहको अन्तिम दिन बैशाख ७ गते वन, वन्यजन्तु तथा जैविक विविधता संरक्षणमा सम्भावना र चुनौती विषयक अन्तक्र्रिया र संरक्षणमा योगदान दिएकाहरुलाई विभिन्न विधामा सम्मान गरिने जनाइएको छ । मृगकुञ्जको अगुवाईमा निकुञ्ज, स्थानीय सरकार, राष्ट्रिय प्रकृति संरक्षण कोष सहित सामुदायिक वन, सौराहाको पर्यटनसंग सम्बन्धित संघसंस्था गरी २६ वटा संघसंस्थाको सहकार्यमा सप्ताह सुरु भएको हो ।

बैशाख ५, दाङ । दाङबाट रुकुमका लागि हिँडेको यात्रुबहाक बस सल्यानको बागचौर नगरपालिका–२ ठिनबाँङमा दुर्घटना हुँदा १४ जना घाइते भएका छन् ।
रा १ ख २०८५ नं को बस बागचौर–२ ठिनबाँङस्थित पुलदेखि तल खस्दा दुर्घटना भएको लुम्बिनी प्रदेश प्रहरी प्रमुख प्रहरी नायब महारिक्षक कुवेर कडायतले बताए । उनका अनुसार घाइतेमध्ये चार जनाको अवस्था गम्भीर छ ।
अहिले नेपाल प्रहरी र स्थानीयले घाइतेहरुको उद्धार गरी थारमारेस्थित अस्पताल तथा जिल्ला अस्पताल सल्यानमा उपचारका लागि लगिरहेका कडायतले जानकारी दिए । उनका अनुसार दुर्घटनाबारे थप विवरण आउन बाँकी छ ।

बैशाख ४, रत्ननगर । तस्विर:  कोमल चन्द्र भगत । वन्यजन्तु संरक्षणको सन्देश विद्यार्थी मार्फत समुदायमा फैलाउने उद्देश्यले सौराहामा दुई प्रतियोगिता गरिएको छ ।चितवनमा जारी वन्यजन्तु सप्ताह अन्तर्गत संरक्षण सम्बन्धी चित्रकाला र बक्तृत्वकाला प्रतियोगिता गरिएको हो । मृगकुञ्ज उपभोक्ता समिति र समुदायमा आधारित चोरी सिकार नियन्त्रण युवा जागरण अभियान उपसमितिले आयोजना गरेको सो प्रतियोगिताको साहित्यकार धनराज गिरीले गरेका थिए ।चित्रकला प्रतियोगितामा न्यू स्पीडि इङ्लिस बोडिङ स्कुलकी प्राश्ना महतो प्रथम, लाइसीयम बोडिङ स्कुलकी बन्दना राना द्धितिय, बैरिया माविकी सविना खातुन तृतीय र एन्जलर्स आमाविका निरज मुखिया र बकुलहर माविका पुसन गिरी सान्त्वना भएका छन् ।

बक्तृत्वकला प्रतियोगितामा ग्रिनसोसाईटी पब्लिक स्कुलकी सायोना भूषाल प्रथम, नेपाल माविकी सर्वज्ञा पौडेल द्धितीय, पञ्चकन्या विद्या मन्दिरकी सम्या रिजाल तृतीय र बैरिया माविकी अदितीआचार्य र एन्जलर्स वर्ड आमाविका हेमन्त पौडेल सान्त्वनाले स्थान हासिल गरेका छन् ।चित्रकला प्रतियोगिताको निर्णायकमा ऋषिराम सुवेदी र पुष्पराज मरहठ्ठा, बक्तृत्वकला प्रतियोगिताको निर्णायकमा धनराज गिरी र शिवप्रसाद भूषाल रहेका थिए । चित्रकलामा प्रथम हुनेलाई पाँच हजार, द्धितृय हुनेलाई तीन हजार, तृतीय हुनेलाई दुई हजार र सान्त्वना हुने दुईजनालाई एक एक हजार तथा बक्तृत्वकलामा प्रथम हुनेलाई १० हजार, द्धितीय हुनेलाई सात हजार, तृतीय हुनेलाई पाँच हजार र सान्त्वना हुने दुई जनालाई दुईदुई हजार प्रदान गरिएको छ ।उद्घाटन कार्यक्रममा मृगकुञ्जका अध्यक्ष दुर्गाप्रसाद घिमिरेले सप्ताहको महत्वपूर्ण कार्यक्रमको रुपमा विद्यालय स्तरीय प्रतियोगिता गरिएको बताए । उनले वन तथा वन्यजन्तु संरक्षणको सन्देश विद्यार्थी मार्फत समुदायमा पु¥याउने उद्देश्यले प्रतियोगिता गरिएको बताए ।

सप्ताह अन्तर्गत भोली बुधबार राप्ती नदी सरसफाई र डुंगा सयर कार्यक्रम रहेको बाघमारा वनका अध्यक्ष जीतु तामाङले जानकारी दिए । समुदायमा आधारित चोरी सिकार नियन्त्रण युवा जागरण अभियानका अध्यक्ष वसन्त रानाले सञ्चालन गरेको कार्यक्रममा रिभर च्याम्पियन उषा महतोले स्वागत मन्तव्य राखेकी थिइन् ।कार्यक्रममा वर्ड एजुकेशन सोसाइटीका अध्यक्ष टिकाराम गिरी, टिकौली वनका कार्यबहाक अध्यक्ष टिकाराम आचार्य, जनकौली वनका सहसचिव फडिन्द्र चौधरी लगायतको उपस्थिति रहेको थियो । चित्रकलाको सहमति संस्था, डेनिडा र डब्लुडब्लुएफ सहयोगी संस्था रहेका थिए ।