समाचार

भदौ, ८, चितवन । भरतपुर अस्पतालले अस्पतालभित्र चोरीका घटना हुन नदिनको लागि ‘लक डोर’को व्यवस्था गरेको छ । अस्पतालमा बिरामी कुरूवा र आफन्त जस्तो बनेर आएपछि पैसा, मोवाइललगायतका सामान चोरी गर्नेहरूलाई नियन्त्रण गर्नको लागि बिरामी कुरूवाको सामान राख्नको लागि वार्डमा लक डोरको व्यवस्था गरिएको अस्पतालका मेडिकल सुपरिटेन्डेन्ट प्राडा कृष्णप्रसाद पौडेलले जानकारी दिए ।
‘अस्पतालमा जो पनि आउने हुँदा सुरक्षा गार्डबाट चोरी गर्ने व्यक्तिलाई प्रवेश निषेध गर्न नसकेपछि विकल्पमा बिरामी कुरूवालाई लक डोरको व्यवस्था गरिएको हो,’ शुक्रबार अस्पतालको सार्वजनिक सुनुवाइका क्रममा प्राडा पौडेलले भने, ‘त्यति गर्दा बिरामी कुरूवालाई अस्पतालले उपलब्ध गराएको कार्ड देखाएपछि मात्रै लक खुल्छ ।’ यसले बिरामी कुरूवाको सामान सुरक्षित हुने उनले बताए ।

विगत लामो समयदेखि शुल्क लिएर सवारीसाधन पार्किङको व्यवस्था गरेको भरतपुर अस्पतालले आउँदो आइतबारदेखि निःशुल्क पार्किङको व्यवस्था गर्न लागेको मेडिकल सुपरिटेन्डेन्ट प्राडा पौडेलले जानकारी दिए । अस्पताल आउने सेवाग्राहीबाट पैसा कमाउने भन्दा पनि सुरक्षित सेवा दिनका लागि स–शुल्क पार्किङको व्यवस्था मिलाउँदै आएकामा आइतबारदेखि त्यसलाई निःशुल्क बनाउन लागेको उनले बताए ।
‘वडा नं।१० लगायतका सरोकारवाला निकायबाट धेरै नै गुनासो र दबाब आएपछि त्यसलाई हामीले निःशुल्क बनाउन खोजेका छौँ,’ प्राडा पौडेलले भने, ‘खासमा अस्पतालको सुरक्षा गार्डले भनेको नमान्ने र निजी क्षेत्रलाई ठेक्का दिँदा सबै मान्ने हाम्रो सामाजिक परम्परा भएकोले शुल्कसहितको पार्किङ गरिएको थियो ।’
अस्पतालको पुरानो गेटअगाडि भरतपुर महानगरपालिका वडा नं. १० ले सार्वजनिक शौचालय निर्माण गरिदिएपछि सेवाग्राहीका लागि धेरै सहज भएको उनले बताए । अस्पतालको पछाडिपट्टि कपडा धुने, सुकाउने र नुहाउने ठाउँको समेत व्यवस्था मिलाएपछि अस्पताल आउने बिरामीका आफन्तहरूलाई थप सहज भएको उनले बताए । त्यसबाहेक आवश्यक संरचना निर्माण र सेवासुविधालाई थप गर्दै लगेको उनको भनाइ छ ।

भदौ, ८, चितवन । भरतपुर महानगरपालिका प्रमुख रेनु दाहालले बृहत सरसफाई अभियान एक वर्षसम्म निरन्तर चल्ने बताउनु भएको छ । अभियान भरतपुर १२ स्थित पूर्व पश्चिम राजमार्गको गोन्द्राङबाट सुरु भएको हो ।
शुक्रबार भरतपुर महानगरपालिकाले आयोजना गरेको बृहत सरसफाई अभियानको उद्घाटन गर्दै प्रमुख दाहालले वडास्तरदेखि नगरस्तरसम्म सरसफाई समिति निर्माण गरी अभियान सञ्चालन हुने उल्लेख गर्नुभयो । यसको तयारी पनि पुरा भएको छ–उहाँले भन्नुभयो ।
भरतपुर महानरपालिकाको कार्यपालिका बैठकले हरेक महिनाको दुई वटा शुक्रबार सरसफाई गर्ने निर्णय पास भएको छ ।
भरतपुरमा विकास प्रयाप्त भएकै छ, अब हरियाली प्रर्वद्धनमा हाम्रो जोड रहन्छ¬–प्रमुख दाहालले भन्नुभयो ।
भरतपुरलाई स्वच्छ हराभरा बनाउने विगतको निरन्तरता रहेको प्रमुख दाहालको भनाई छ ।
भरतपुर महानगरपालिकाले भ्रमण वर्ष २०२४ लाई लक्ष्ति गरी सरसफाईलाई प्राथामिकतामा राखेर काम गरी रहेको छ । महानगरपालिकाले महिनाको पहिलो र अन्तिम शुक्रबार अनिवार्य रुपमा सरसफाई अभियान चलाउने गरी अगाडि बढेको महानगरका प्रमुख प्रशासकीय अधिकृत नरेन्द्र कुमार रानाले बताउनुभयो ।
सभ्य र सुन्दर भरतपुर निर्माण गर्न वृक्षरोपण कार्यक्रमलाई विषेश जोड दिई सडको दाँया बायाँ वृक्षरोपण गर्ने कार्य अगाडि बढिरहेको बताउनुभयो ।
भरतपुरलाई हरित सहर बनाउने कार्यमा सबै जनाले हातेमालो गर्न आवश्यक रहेको बताउनुभयो । सरसफाई कार्यक्रममा प्रमुख जिल्ला अधिकारी भूपेन्द्र थापा, जिल्ला प्रहरी कार्यालयका एसपी रामेश्वर कार्की, विभिन्न संघ संस्था प्रतिनिधिको उपस्थिति रहेको छ ।

चितवन, भदौ ८ ।

२०८० भदौ ८, काठमाडौं । समाजवादी मोर्चा अन्तरगतको विद्यार्थी संगठनहरुले इन्जिनियरिङको स्नातक तहमा भएको शुल्कवृद्धि खारेज नगरे कडा आन्दोलनको चेतावनी दिएका छन् । संवाद डबलीमा पत्रकार सम्मेलन गरेर इन्जिनियरिङ अध्ययन संस्थान (आइओई) लाई आज (शुक्रबार) बेलुकासम्म शूल्कवृद्धिको लागि अल्टिमेटम दिएका छन् ।
चार विद्यार्थी संगठनले संयुक्त पत्रकार सम्मेलनमा इन्जिनियरिङको स्नातक तहमा नियमिततर्फ शुल्क ३५ हजारबाट बढाएर ८२ हजार र पूर्ण शुल्कतर्फ ३ लाख ३० हजारबाट बढाएर ७ लाख ७५ हजार पु¥याएको प्रति संयुक्त विद्यार्थी संगठनले आपत्ति जनाएका छन् ।
पत्रकार सम्मेलनमा सत्तारुढ दल नेकपा माओवादी केन्द्र निकट विद्यार्थी संगठन ९अनेरास्ववियु क्रान्तिकारी० का अध्यक्ष पन्चा सिंहले वार्ताको नाटक मन्चन गरेर भ्रममा नपार्न चेतावनी दिइन् । उनले विभिन्न कलेजहरुमा भइरहेको आन्दोलनमा आफूहरुको ऐक्यबद्धता रहेको समेत जनाइन् ।
“वार्ताको नाटक मन्चन गरेर आन्दोलन तुहाउने दुष्प्रयत्न गरिन्छ भने यो वार्ता खारेज गरिन्छ र चारवटा विद्यार्थी संगठनको तर्फबाट निशर्त ढंगले त्यो शुल्कवृद्धि खारेज नगरेसम्म हामी वार्ताको प्रक्रियामा नजाने कुरा पनि म यो पत्रकार सम्मेलनमार्फत जानकारी गराउन चाहान्छु” अध्यक्ष सिंहले भनिन् ।
नेकपा (एस) निकट अनेराश्ववियुका अध्यक्ष सुदेश पराजुलीले आफ्नै पार्टीहरु सत्ताको नेतृत्वमा रहेपनि गलत विषयमा खरो उत्रने बताए । शुल्कवृद्धि तत्काल खारेज नभए आइएओई प्रमुखलाई गलत्याएर सडकमा ल्याउने चेतावनी दिए ।
जनता समाजवादी निकट समाजवादी विद्यार्थी युनियन नेपालका अध्यक्ष रमेश यादबले संविधानले शिक्षा निशुल्क भनेपनि शैक्षिक माफियाको अगाडि सबै निरिह हुनु दूर्भाग्य भएको बताए ।
नेकपा (विप्लव) निकट अखिल (क्रान्तिकारी) का उपाध्यक्ष नरेन्द्र विश्वकर्माले दलाल र माफियाहरुको चंगुलमा रहेको नेपाली शिक्षा क्षेत्रलाई नागरिकको पहुँचमा पुर्याउन जुनसुकै हदमा जाना तयार रहेको धारणा राखे ।
“नेपालको इन्जिनियरिङ शिक्षाको केन्द्रको रुपमा परिचित र आधारभुत रुपमा जनताको पहुँचमा रहेको इन्जिनियरिङ्ग अध्ययन संस्थानले आंगिक क्याम्पसहरुमा दोब्बरभन्दा बढी शुल्क अकस्मात बढाउनुले आर्थिक रुपमा विपन्न तथा जेहेन्दार विद्यार्थीहरुलाई इन्जिनियरिङ्ग शिक्षाबाट बञ्चित गराउने निश्चित छ । इन्जिनियरिङ अध्ययन संस्थानको यो रबैयाको हामी घोर भत्र्सना गर्दछौं” संयुक्त विज्ञप्तिमा भनिएको छ ।