समाचार

फागुन ४, सौराहा । तस्विर : अंकित भगत । चितवनको पर्यटकीय नगरी सौराहामा आयोजना गरिएको १८औं सौराहा फुड फेस्टिबल विहीबारराती सकिएको छ । प्रणय दिवसको अबसरमा रेष्टुरेण्ट एण्ड बार एशोसियसन नेपाल (रेवान) सौराहाले फेस्टिबल आयोजना गरेको थियो । पाँच दिन सम्म सञ्चालन भएको सो फेस्टिबल पर्यटन प्रबर्द्बनका हिसाव सफल भएको रेवान सौराहाका अध्यक्ष ध्रुुव गिरीले जानकारी दिए । फेस्टिवलको करिब ३० हजार पर्यटकले अबलोकन गरेका छन् ।

चार दिन प्रवेश शुल्क निस्शुल्क गरेको रेवानले प्रणय दिवसको दिन फागुन २ गते मात्र प्रवेश शुल्क लिएको थियो । सो दिन १२ हजार बढीले फेस्टिबल अबलोकन गरेको अध्यक्ष गिरीले बताए । सौराहाका व्यवसायीले मुनाफा आर्जन गर्नु भन्दा पनि सौराहामा पर्यटक भित्र्याउन हरेक बर्ष फेस्टिबल गर्दै आएका छन् । एक दिन लगाइएको प्रवेश शुल्क बापत भएको आम्दानी सौराहाको सौन्दर्यकणका लागि खर्च गर्ने योजना रहेको अध्यक्ष गिरीले बताए । फेस्टिबल अन्तर्गत विभिन्न सांस्कृतिक कार्यक्रम, स्वादिष्ट खानाका परिकार र विभिन्न प्रतियोगिता गरिएको कार्यक्रम संयोजक सुर्यबहादुर रिमालले बताए । समापन कार्यक्रममा वेटर रेस, विद्यालय स्तरीय नृत्य प्रतियोगिता, ब्याडमिन्टन प्रतियोगिता र म्युजिकल चियर प्रतियोगितामा उत्कृष्ट हुनेलाई पुरस्कार तथा फेस्टिबल सफल बनाउन सहयोग गर्ने संघसंस्था तथा व्यक्तिहरुलाई मायाको चिनो प्रदान गरिएको थियो । सोही कार्यक्रममा रक्तक्यान्सरबाट पीडित व्यवसायी राजन तामाङकी धर्मपत्नीको उपचारको लागि रेवान सौराहाले १५ हजार र सपना भिलेज सोसल इम्प्याक्टले १५ हजार आर्थिक सहयोग गरेका थिए ।

त्यसैगरी फेस्टिबलमा रहेका होटल तथा रेष्टुरेन्टका स्टलहरु मध्ये तीन वटालाई उत्कृष्ट छनौट गरिएको छ । छनौट प्रतियोगितामा होटल आईकावा प्रथम, केसी रेष्टुरेन्ट द्धितीय र होली लज तृतीय हुँदै नगद पुरस्कार प्राप्त गरेका छन् । सौराहा सहित चितवनको पर्यटन विकासको लागि प्रणय दिबसको अबसर पारेर फेस्टिबल आयोजना गरिएको हो । समग्र सौराहाको पर्यटन विकास गर्ने, विभिन्न जातजातीका परम्परागत तथा स्थानीय, स्वदेशी, विदेशी खानाको प्रवर्द्धन गर्ने, स्थानीय कलासँस्कृति, भेषभुषाको जगेर्ना गर्दै पर्यटकीय गन्तव्यको रुपमा सौराहालाई राष्ट्रिय तथा अन्तराष्ट्रिय स्तरमा पहिचान गराउने, उज्यालो सौराहालाई निरन्तरता दिइने, प्रवेश टिकटबाट भएको आम्दानीले सौराहा पर्यटन मार्ग सौन्दर्यकरण गर्ने उद्देश्यले फेस्टिबल आयोजना गरिएको रेवानका महासचिव नविन नेपालले जानकारी दिए । रत्ननगर नगरपालिका संरक्षक रहेको सो फेस्टिबलको सहआयोजकमा रेवान महिला समूह, क्षेत्रीय होटल संघ नेपाल, चितवन, युनाईटेड हात्ती सञ्चालन सहकारी संस्था रहेका छन् ।

 भरतपुर । विगत १५ वर्षदेखि जापानमा रहँदै आएका भरतपुर–४ का दयाराम कँडेलले प्रेस चौतारी चितवनको नवनिर्मित भवन निर्माणार्थ २५ हजार ६०० नगद सहयोग गरेका हुन् । केही दिनका लागि गृहनगर भरतपुर आएका कँडलले (नेकपा) एमालेका जिल्ला अध्यक्ष रामप्रसाद न्यौपाने, बागमती प्रदेश कमिटीका सदस्य कृष्णप्रसाद भुर्तेललगायतलको उपस्थितिमा प्रेस चौतारी चितवनका संस्थापक अध्यक्ष रामबाबु सुवेदीलाई सो रकम हस्तान्तरण गरेका थिए । आफू नेकपा एमालेसँग नजिक रहेको भन्दै उनले चौतारीको इतिहासमा देशभरकै पहिलो भवन बन्न लागेकोमा सहयोग गर्न पाउँदा खुसी लागेको बताए । उनले आउँदा दिनमा सहयोग गर्र्दै जाने प्रतिबद्धता जनाए । सो अवसरमा एमाले जिल्ला अध्यक्ष रामप्रसाद न्यौपानेले सहयोगी दाता कँडेलप्रति धन्यवाद व्यक्त गर्दै राजनैतिक, सामाजिक जीवनको प्रगतिको कामना गरेका थिए ।

२, फागुन, चितवन ।
जन्मदिनको अवसरमा उद्योग बाणिज्य संघ चितवनका कार्यसमिति सदस्य उपेन्द्र पण्डितले प्रेस चौतारी चितवनको भवन निर्माणका लागि आर्थिक सहयोग गरेका छन् । भरतपुर महानगरपालिका–११ बसेनीमा निर्माण हुँदै गरेको भवनका लागि पण्डितले २५ हजार रुपैयाँ सहयोग गरेका छन् । रतनपुर चितवन मिलन समाजका सहसचिवसमेत रहेका पण्डितले आफ्नो पुख्यौली जन्मथलो तनहुँको भानु नगरपालिका वडा नं। १२ रतनपुर अर्चलेमा रहेको श्री राष्ट्रिय जलदेवी आधारभूत विद्यालयमा आयोजित एक कार्यक्रमका बीचमा प्रेस चौतारी चितवनका अध्यक्ष सुवास पण्डितलाई सो रकम हस्तान्तरण गरेका हुन् । पण्डितले विद्यालयमा पढ्ने ३८ जना बालबालिकालाई जन्मदिनको अवसरमा पोशाक, एक बर्षलाई पुग्ने कापी, कलम, मन्जन, ब्रस लगायतका सामाग्री हस्तान्तरण गरेका थिए ।
प्रेस चौतारीको देशकै पहिलो भवन प्रेस चौतारी चितवनमा निर्माण हुनु खुसीको कुरा भएको भन्दैं पण्डितले भवन निर्माणले चाँडै नै पूर्णता पाउने विश्वास ब्यक्त गरे । उनले भवनका लागि आफूले ब्यक्तिगत रुपमा र अन्य साथीहरुबाट समेत सहयोग जुटाउन पहल गरेको भन्दैं पत्रकारहरुको संस्थागत विकासका लागि भवन महत्वपूर्ण हुने विश्वास ब्यक्त गरे । पण्डितले जन्मदिनको अवसरमा फजुल खर्च गर्नुभन्दा यस्तैं सामाजिक काममा सहयोग गर्न पाउँदा आनन्द लाग्ने बताए । प्रेस चौतारी चितवनका अध्यक्ष पण्डितले भवनका लागि सहयोग गर्ने पण्डितलाई धन्यवाद दिँदै भवनले चाँडै नै पूर्णता पाउने बताए । उनले पण्डितले संगठन प्रति दर्शाएको माया र सद्भाव अनुकरणीय रहेको बताए । समाजसेवी केशव कार्कीले प्रेस चौतारी चितवनलाई उपलब्ध गराएको झण्डैं ७० लाख पर्ने १० धुर जग्गामा अहिले भवन बनिरहेको छ । सो जग्गामा बन्दै गरेको भवनको लागत १ करोड ५० लाख छ । भवनको दोस्रो तला ढलान भैसकेको छ । भवनको फिनिसिङको काम भैरहेको छ । भवनमा आर्थिक सहयोग जुटाउन चौतारी चितवनले गत बर्ष वृहत सांस्कृतिक तथा साहित्यिक कार्यक्रम आयोजना गरेको थियो । भवनका लागि विभिन्न व्यक्ति तथा संघसंस्थाहरुले सहयोग गर्दै आएका छन् । भवनको भूईं तलामा कार्यालय कक्ष रहनेछ । पहिलो तलामा कार्यक्रम गर्न मिल्ने हल बन्ने अध्यक्ष पण्डितले जानकारी दिए ।