समाचार

मंसीर २०, भरतपुर । तस्विर कोमल चन्द्र भगत । भरतपुरका घर घरमा पुगेर स्वास्थ्यकर्मीले जेष्ठ नागरिक, अशक्त तथा अपाङ्गलाई स्वास्थ्य सेवा दिने कार्य सुरु भएको छ । स्वास्थ्यकर्मीहरुले विषेश गरी नसर्ने रोग लागेका विरामीलाई सेवा दिने छन् । बुधबार एक कार्यक्रमका बीच भरतपुर महानगरपालिका प्रमुख रेनु दाहालले भरतपुर २४ मा समुदायसँग मेयर स्वास्थ्य कार्यक्रम उद्घाटन गर्नुभयो । प्रमुख दाहालले दाहालले स्वास्थ्य सामग्री स्वास्थ्यकर्मीहरुलाई हस्तान्तरण गरेर कार्यक्रमको उद्घाटन गर्नुभएको हो । कार्यक्रमको उद्घाटन गर्दै महानगर प्रमुख रेनु दाहालले महानगरवासी सामान्य स्वास्थ्य उपचारबाट वञ्चित हुनु नपरोस् भनेर यो कार्यक्रम आयोजना गरिएको बताउनुभयो । यस कार्यक्रममा समस्या देखिएका बिरामीहरुको थप उपचार शिवनगर र शारदानगरको प्राथमिक स्वास्थ्य चौकीमा गरिने उहाँले बताउनुभयो । उहाँले भन्नुभयो, “थप उपचारका लागि भरतपुर अस्पतालसँग समन्वय भएको छ ।” यस कार्यक्रमअन्तर्गत महानगरपालिकाका ज्येष्ठ नागरिक, अशक्त, अपाङ्गता भएकाको घरघरमा पुगेर स्वास्थ्य परीक्षण गरिनेछ । महानगरभित्र रहेका ६८ वर्षमाथिका करिब २५ हजार ज्येष्ठ नागरिकलाई घरदैलोमा पुगेर मधुमेह, उच्च रक्तचाप, उचाइ र तौल लिइने छ । दाहालका अनुसार पहिलो चरणमा महानगरको १४ वटा वडामा यो कार्यक्रम लागु हुन्छ । पहिलो चरणको कार्यक्रम २५ दिनसम्म सञ्चालन हुन्छ । बाँकी १५ वडामा अर्को चरणको कार्यक्रम सञ्चालन हुनेछ ।

यस क्रममा आएका जनताका समस्यालाई समाधानका लागि शिविरमार्फत स्वास्थ्य समस्या समाधान गरिने उहाँले जानकारी दिनुभयो । उहाँका अनुसार यस कार्यक्रममा एक सय स्वास्थ्यकर्मी परिचालन हुनेछन् । अभियानका क्रममा स्वास्थ्यकर्मीले घरघरमा सामान्य औषधिसमेत लिएर जानेछन् । सो अभियानमा नसर्ने रोगका विषयमा बढी ध्यान दिइनेछ ।करिब ६० प्रतिशत जनतामा नसर्ने रोगको समस्या रहेको सुवेदीले बताउनुभयो ।

स्वास्थ्य कार्यक्रमका लागि महानगरले स्वास्थ्य विज्ञका रुपमा फिजिसियन डा भोजराज अधिकारीलाई नियुक्त गरेको छ ।

महानगरभित्र प्राथमिक स्वास्थ्य चौकी, स्वास्थ्य केन्द्र, आधारभूत स्वास्थ्य केन्द्र, नगर स्वास्थ्य केन्द्र र आयुर्वेद स्वास्थ्य केन्द्र गरी ४० स्वास्थ्य उपचार केन्द्र रहेका छन् । वडा नं २४ का वडाध्यक्ष रामबहादुर गोदारको अध्यक्षतामा सम्पन्न कार्यक्रममा घरघर जाने स्वास्थ्यकर्मीलाई स्वास्थ्य परीक्षणका सामग्री हस्तान्तरण गरिएको थियो । यससँगै महानगर प्रमुख दाहालको उपस्थितिमा स्थानीय ७२ वर्षीय टीकाराम भट्टराईको स्वास्थ्य परीक्षण गरेर कार्यक्रमको शुभारम्भ गरिएको थियो ।

–––

मंसीर १९, गुलरिया । बर्दिया राष्ट्रिय निकुञ्जको हात्तीसारमा रहेका हात्तीहरूको पूजा गरिएको छ। बर्दियामा पाइने एशियाकै ठूलो हात्ती राजागज हराएको स्मरणमा हात्तीसारको चउरमा बनाइएको खमारी (हात्ती बाध्ने खम्बा) स्थलमा विविध कार्यक्रमसहित हात्ती पूजा गरिएको हो। परम्परागत दसैंका अवसरमा हात्तीबाट सुँगुर कुल्चाउने परम्परा अन्त्य गर्दै हात्ती पूजा आयोजना गरिएको हात्ती पूजा आयोजक चोरी शिकार नियन्त्रण युवा परिचालन अभियानका अध्यक्ष हेमन्त आचार्यले बताए। हिन्दु धार्मिक मान्यताअनुसार हात्तीलाई गणेश भगवानको प्रतिकका रूपमा मानिने भएकाले मंगलबार पारेर पूजा कार्यक्रम राखेका हौं उनले भने, पूजाका माध्यमबाट हात्ती मानवबीच आत्मीयता बढाउँदै दिगो संरक्षणमा टेवा पुग्ने हाम्रो बिस्वास छ। गुरुवाबाट हात्तीको पूजा गरिएको छ। गुरुवाले पूजा मार्फत जंगली हात्तीलाई जंगल बाहिर आउन नसक्ने गरी विधिपूर्वक झारफूक गरेर मन्त्रद्वारा बाधेको अध्यक्ष आचार्यको भनाइ छ। पूजा पश्चात हात्तीलाई फलफूल, उखु, मिष्ठान्न भोजन गराएको छ । निकुञ्जको आर्थिक सहयोगमा आयोजित हात्ती पूजा कार्यक्रममा संरक्षणका क्षेत्रमा कार्यरत एक दर्जन संस्थाहरूले सहकार्य गरेका छन्। हात्ती पूजा कार्यक्रम मार्फत पर्यापर्यटनलाई समेत सहजीकरण हुने अपेक्षा गरिएको छ ।

मंसीर १९, चितवन ।

मंसीर १९, चितवन
अमेरीकामा बसोबास गर्ने नेपालीहरुले सञ्चालन गरेको संस्था नेपाल जर्नी नामक संस्थाले चितवनको भरतपुर महानगरपालिका वडा नं. ४ वडा कार्यालय संगैं रहेको खाली जग्गामा अपांगमैत्री विद्युतिय पुस्तकालय भवन निर्माण गर्ने भएको छ । भरतपुर महानगरपालिका कार्यपालिकाको निर्णय अनुसार नेपाल जर्नी संस्थालाई भवन निर्माण गर्न जग्गा उपलब्ध गराउने निर्णय पश्चात भरतपुर महानगरपालिका, नेपाल जर्नी अमेरीका र नेपाल जर्नी चितवन बिच संयुक्त रुपमा सम्झौता भएको हो । अपांगमैत्री भवन निर्माणको लागि भरतपुर महानगरपालिकाले २ कठ्ठा १० धुर जग्गा नेपाल जर्नी संस्थालाई उपलब्ध गराएको छ । भित्री सजावट बाहेक ३ करोड २२ लाख रुपैंयाको लागतमा निर्माण हुन लागेको भवनको बिल्डकोन डिजाइन एण्ड डेभलपर्स प्रा.लि. भरतपुरले निर्माण सम्झौता गरेको छ । कन्ट्रयाक्टर र कन्सल्टेन्ट स्वयं रहेको प्रा.लि.ले यहि मंसीर १२ गते भवन निर्माण सम्झौता गरेको हो । कम्पनीले दुइ वर्ष भित्र अर्थात वि.सं. २०८२ जेठ २ गते सम्ममा निर्माण कार्य पुरा गरी संस्थालाई हस्तान्तरण गरिसक्नु पर्ने छ ।
शिक्षाबाट बञ्चित विपन्न परिवारका बालबालिकाहरुलाई लक्षित गरी उनीहरुको शिक्षामा सहयोग पु¥याउने उद्देश्यले संस्थाको स्थापना गरिएको नेपाल जर्नीका नेपाल शाखा अध्यक्ष कमलप्रसाद आचार्यले बताउनुभयो । अपांगमैत्री विद्युतीय पुस्तकालय निर्माणका लागि महानगर संग सम्झौता भए संगै निर्माण शुरु गर्न लागिएको अध्यक्ष आचार्यको भनाइ छ । यस परियोजना मार्फत निर्माण हुने भवनको काम यथाशिघ्र सम्पन्न गर्न भरतपुर महानगरपालिकाका प्रमुख रेनु दाहाल र उप प्रमुख चित्रसेन अधिकारीले सहजीकरण गर्नु भएको छ । यस संस्थाले यस अघि पनि विभिन्न ठाउंहरुमा विद्यालय निर्माण, विद्यालय पोशाक, शैक्षिक सामाग्री वितरण लगायतका कामहरु गरिरहेको छ ।