समाचार

मंसीर २५, रत्ननगर । हंस बहुउद्देश्यी सहकारी संस्थाको २०औं बार्षिक साधारण सभा तथा १४औं बार्षिकोत्सव समारोहमा सोमबार रत्ननगर स्थित टाँडी सेवा केन्द्रमा गरिएको छ । साधारण सभा रत्ननगर नगपालिकाका उपमेयर यादव प्रसाद पाठकले उद्घाटन गरेका थिए । सो अबसरमा उनले उत्पादनशिल क्षेत्रमा लगानी गर्न सहकारीलाई आग्रह गरे । पैसा कमाउने उद्देश्य मात्र नराखी शेयर सदस्यको समस्यालाई प्राथमिकतामा राखेर लगानी गर्न उनले सुझाब दिए । साधारण सभामा प्रस्तुत गरिएको आर्थिक प्रतिवेदनमा सो सहकारीले एक बर्षमा करिब तीन करोड रुपैया सञ्चालन मुनाफा गर्न सफल भएको जनाइएको छ । सो संस्थाले आर्थिक बर्ष २०७९÷८० मा २ करोड ९३ लाख २५ हजार रूपैया मुनाफा गर्न सफल भएको हो । आर्थिक प्रतिवेदनमा १२ करोड १ लाख ६९ हजार आम्दानी गरेकोमा ९ करोड ८ लाख ४४ हजार खर्च कटाएर २ करोड ९३ लाख २५ हजार रूपैया मुनाफा गर्न सफल भएको हो । भरतपुर महानगरको शहीदचोक मुख्य कार्यालय रहेको सो सहकारको चुक्ता पूँजि १० करोड २३ लाख ७८ हजार, जगेडा कोषमा ५ करोड ९२ लाख ५५ हजार, कुल सम्पती ८६ करोड ८८ लाख ७९ हजार रहेको छ । ६० करोड ८४ लाख २० हजार बचत संकलन गरेको सो सहकारीले ६२ करोड ७२ लाख २२ हजार ऋण लगानी तथा २१ लाख ६७ हजार शेयर लगानी गरेको संस्थाका अध्यक्ष दिनेशकुमार चुकेले जानकारी दिए । २०५६ सालमा स्थापना भएको सो सहकारीमा ४ हजार ६२७ जना शेयर सदस्य रहेको छन् । सो सहकारीले जिल्लाका तीन ठाउँमा सेवा केन्द्र सञ्चालमा ल्याको छ । संस्थामा प्रबन्धक नारायणप्रसाद सापकोटाले प्रगति प्रतिवेदन, कोषाध्यक्ष प्रमोदकुमार श्रेष्ठले आर्थिक प्रतिवेदन र लेखा समिति संयोजक गोविन्दप्रसाद पौडेलले आन्तरिक लेखा परीक्षण प्रतिवेदन प्रस्तुत गरेका थिए । कार्यक्रममा उत्कृष्ट बचतकर्ता ८ जना, असल ऋणि ३ जना र ज्येष्ठ शेयर सदस्य र वालबचतकर्ता १÷१ जनालाई सम्मान गरिएको छ । संस्थाका अध्यक्ष चुकेको अध्यक्षतामा भएको कार्यक्रममा वडाध्यक्ष कुलप्रसाद सापकोटा, शेयर सदस्यहरु किरण बुर्लाकोटी, सृजना श्रेष्ठ लगायतले मन्तब्य राखेका थिए । संस्थाकी सचिव शारदा शर्मा पौडेलले सञ्चालन गरेको सो कार्यक्रममा उपाध्यक्ष बाबुराम अधिकारीले स्वागत मन्तव्य राखेका थिए ।

मंसीर २३, सौराहा । तस्विर कोमल चन्द्र भगत । 

चितवन नेपाल बार एशोसिएसनले मानवअधिकार सम्बन्धी राष्ट्रिय गोष्ठी तथा ४९औँ केन्द्रीय कार्यकारिणी परिषद् बैठक आजदेखि सौराहामा सुरु भएको छ । सर्वोच्च अदालतका न्यायाधीश आनन्दमोहन भट्टराईले गोष्ठीको उद्घाटन गर्नुभएको हो । गोष्ठीमा देशभरका एक हजारभन्दा बढी कानुन व्यवसायी सहभागी छन् । सो अवसरमा न्यायाधीश आनन्दमोहन भट्टराईले न्यायलयको विश्वास कायम गर्न पारदर्शीताको मार्ग अपनाएको बताउनुभयो । जसको कारण न्यायलयको गरिमा बढाउन गोला प्रथा विधि अपनाएको स्पष्ट पार्नुभयो । उहाँले संकटमा बार र बेन्च एक ठाँउमा उभिएको सम्झिदै भट्टराईले न्यायलयको विश्वास गुम्न नदिएको दावी गर्नुभयो । एशोसिएसनका अध्यक्ष गोपालकृष्ण घिमिरेका अनुसार दुई दिनसम्म सञ्चालन हुने गोष्ठीमा मानव अधिकारको अवस्था, पश्चिम एशियमा जारी द्वन्द्वलगायत विषयमा छलफल हुनेछ । उहाँले भन्नुभयो, “इजरायलमा रहेका नेपालीलाई लिएर नेपाल बार एशोशिएसन गम्भीर छ । इजरालयमा १० जना नेपाली विद्यार्थीको ज्यान गयो । त्यहाँको अवस्थालाई लिएर हामीलाई चिन्ता छ ।” अहिले पनि विपिन जोशी हमासको कब्जामा रहेको र उहाँको रिहाइका लागि आवाज उठाइने उहाँले बताउनुभयो ।

सम्मेलनमा विश्वभरी घटेका घटना र नेपालमा मानव अधिकारको अवस्था र सरकारको कार्यशैली र उसको दायित्वको विषयमा छलफल भईरहेको छ । टिकटक बन्द गर्ने सरकारको कदमले प्रेस स्वतन्त्रता माथीको हस्तक्षेप भएको ठहर गर्दै बारले यसको विषयमा समेत संस्थागत रुपमा धारणा सार्वजनिक गर्ने नेपाल बार एशोशियन चितवनका अध्यक्ष खगराज कँडेलले जानकारी दिनुभयो ।

माडी, २४ मंसीर ।
माडीको बरुवास्थित चितई खोला पुलमाथि भएको दुर्घटनामा गम्भीर घाइते भएका सुर्य अधिकारीको पनि दुखद् मृत्यु भएको छ ।
दुर्घटनामा परी गम्भीर घाइते हुनुभएका अन्दाजी ४० बर्ष उमेरका, माडी न.पा.१, बरुवा बजार, चितवन निवासी नेपाली काँग्रेसका युवा नेता एवं सोमेश्वर माध्यमिक विद्यालय, माडी १, बरुवा, चितवनमा कार्यरत लेखापाल सुर्य अधिकारीको समेत मृत्यु भएको हो ।
दुर्घटनालगत्तै बघौंडा अस्पतालमा प्राथमिक उपचार भई थप उपचारका लागि भरतपुरस्थित सि.एम.सी. अस्पताल लगिएका अधिकारीको मध्यरात करीब १२ः४५ बजे मृत्यु भएको परिवार श्रोतले जनाएको छ । दिवंगत अधिकारीको हात र खुट्टा लगायत शरीरका विभिन्न भागमा गम्भीर चोट लागेको थियो ।
सोही दुर्घटनामा पर्नुभएका सिम्ता गाउँपालिका.३, आग्रीगाउँ, सुर्खेत निवासी शिक्षक बेगबहादुर खत्रीको उपचारका क्रममा बघौंडा अस्पतालमा शनिवार साँझ करीब ६ः३० बजे निधन भएको थियो । दुर्घटनामा परी घाइते हुनुभएका तेश्रो व्यक्ति (शिक्षक) भुवानी पौडेलको भरतपुरमै उपचार चलिरहेको छ ।
शनिवार साँझ करीब ६ बजे चितई पुलमाथि लु. २ च. २५०८ नम्बरको बोलेरो गाडीले शिक्षकहरू सवार बागमती प्रदेश ०६ ००१ प ४०९३ नम्बरको मोटरसाइकललाई ठक्कर दिँदा सो भयानक दुर्घटना भएको हो । दुर्घटनामा परेको बोलेरो गाडी र त्यसका चालक साथै दुर्घटनाग्रस्त मोटरसाइकल प्रहरीको नियन्त्रणमा रहेका छन् ।