समाचार

बैशाख ३०, काठमाडौँ।  काठमाडौँमा रहनु हुने धरानेहरुको साझा संस्थाको रुपमा खोलिएको हामी धराने , काठमाडौंद्वारा बैसाख २९ गते शनिबार आयोजित धराने वनभोज तथा नव वर्ष शुभकामना आदानप्रदान कार्यक्रम २०८१ च्वङ्गा गणेश थान परिसर , सल्लाघारी भक्तपुरमा २७९ जना धरानेहरुको उपस्थितिमा सभ्य र भव्य रुपमा सम्पन्न भएको छ । बिहान ९ः०० बजेदेखि साँझ सम्म भएको कार्यक्रम रक्तदान कार्यक्रम बाट शुरु गरी रमाइलो नाचगान गर्दै सम्पन्न भएको थियो । रक्तदान कार्यक्रममा ४२ जना धराने रक्तदाताहरुले रक्तदान गर्नु भएको थियोे ।

कार्यक्रममा धराने लाखे समुहले लाखे नाच प्रस्तुत गर्दा सबै धरानेहरुले धरानमै भएको अनुभूति गरे भने चन्द्र श्रेष्ठको फेस पेन्टिंग र स्केचिंगले कार्यक्रममा धेरै धरानेहरुले अनुहारमा धरान झल्काउने पेन्टिङरु गरेर वनभोजको माहौलमा थप रौनकता थपिएको थियो ।
संस्थाका अध्यक्ष राजेन्द्र श्रेष्ठको सभापतित्वमा गरिएको औपचारिक कार्यक्रममा प्रमुख अतिथि प्रतिनिधि सभाका सदस्य माननीय अशोककुमार राईज्यूले कलशमा दियो बालेर गर्नुभएको थियो। कार्यक्रमको अन्य अतिथिहरुमा न्याय परिषद सदस्य रामकुमार श्रेष्ठ , खाद्य गुणस्तर नियन्त्रणका पूर्व महानिर्देशक जीवन प्रभा लामा, पूर्व सचिव तथा धरान सरोकार समाजका अध्यक्ष चन्द्र घिमिरे, वरिष्ठ गायिका मथुरा श्रेष्ठ , कन्सल्टेन्ट युरोलोजिष्ट डा. पुकार मास्के , पत्रकार तथा मकाउका लागि पर्यटन प्रवर्तक आनन्द श्रेष्ठ र सेवा निवृत्त शिक्षिका ललिता श्रेष्ठ हुनुहुन्थ्यो । कार्यक्रममा आफ्नो जीवनको आधाभन्दा बढि समय शिक्षण पेशामा खर्चिनु भएकी ८४ वर्षिया शिक्षिका ललिता श्रेष्ठलाई प्रमुख अतिथि अशोक राई द्वारा दोसल्ला ओढाई सम्मान समेत गरिएको थियो भने अतिथि गण लगायत कार्यक्रम सफल बनाउन प्रायोजन तथा स्वयंसेवक गर्नुहुने महानुभावहरुलाई प्रशंसा पत्रका साथै मायाको चिनो प्रदान गरिएको थियो ।

औपचारिक कार्यक्रमपछि सबैको लोकप्रिय खेल हाउजी पनि खेलाइएको थियो । मनोरञ्जन नाचगान गरी कार्यक्रमको समापन गरिएको थियोे । हरेक बर्ष काठमाडौँमा रहनु हुने धरानेहरुको जमघट तथा नयाँ बर्षको शुभकामना आदान प्रदानका कार्यक्रम आयोजना गर्ने तथा काठमाडौँमा रहनु हुने धरानेहरुको हकहित संगै धरानको बिकासको लागि हर समय हामी धराने लागि पर्ने अध्यक्ष राजेन्द्र श्रेष्ठले बताउनु भयो।

बैशाख २९, रत्ननगर । सौराहा सहित चितवनको पर्यटन विकासको लागि समन्वय समिति बनाइएको छ । रत्ननगर नगरपालिकाले समग्र चितवनको पर्यटन विकासको लागि भेषराज दुवाडी संयोजक अध्यक्ष रहेको रत्ननगर पर्यटन विकास समन्वय समिति बनाएको हो ।

चितवन उद्योग संघका पूर्व अध्यक्ष समेत रहेका दुवाडी पर्यटन व्यवसायको विकासको लागि अनुभवी व्यवसायी हुन् । मुलुकको तेस्रो पर्यटकीय गन्तव्य सौराहालाई केन्द्रीत गरेर चितवनको पर्यटन विकासको लागि अधिकार सम्पन्न समन्वय समिति बनाइएको हो । सो समितिलाई पूर्वी चितवनका चार पालिकाका पर्यटन व्यवसायी, संरक्षणकर्मीहरुलाई समाबेस गरी पूर्णता दिने तयारी गरिएको संयोजक दुवाडीले जानकारी दिए ।

पूर्वी चितवनको पर्यटन विकासको लागि सम्भावित पर्यटकीय क्षेत्रहरुलाई सौराहासंग जोड्ने र तीनै तहको सरकारको लगानीमा पूर्वाधार निर्माण गर्ने गरी योजना बनाइने उनले बताए । सौराहालाई केन्द्र बनाएर चितवनको चारवटै पालिकामा रहेका पर्यटकीय क्षेत्र जोड्न  उक्त स्थानमा विदेशी पर्यटक भित्र्याउने संयोजक दुवाडीले बताए । सौराहामा करिब ४ बर्ष अघि घोषणा गरेको घुमौं सौराहा अभियान कोरोना महामारीले प्रभावित भएको थियो । सौराहा सहित चितवनको पर्यटन विकासको लागि घुमौ सौराहालाई निरन्तरता दिने अध्यक्ष दुवाडीले बताए ।

घुमौ सौराहालाई निरन्तरता दिन आफुले व्यवसायी र जनप्रतिनिधिहरुसंग छलफल गरेर योजना निर्माणको थालनी गरेको दुवाडीको भनाई छ । चितवनमा पर्यटक भित्र्याउन विद्युतिय बजारीकरणलाई  अबलम्बन गर्ने र बार्षिक ४ लाख पर्यटक भित्र्याउने गरी तयारी गरिने उनले बताए । समितिका संयोजक भेषराज दुवाडीले सौराहालाई सिरानी हालेर चितवनको पर्यटन विकासको लागि कार्ययोजना बनाएर देखिने गरी काम गर्ने भन्दै सौराहालाई पर्यटन क्षेत्र घोषणा, गुरुयोजना निर्माण र सुचना केन्द्र सञ्चालन, विद्युतिय बजारीकरण र अत्याधिक रुपमा सुचना प्रविधिको प्रयोग गरी घुमौ सौराहा अभियानलाई अगाडि बढाउने बताए ।

सौराहामा ध्वनि प्रदूषण, अव्यवस्थित पाकिङ, निकुञ्जको टिकटको समयाबधिको विषयमा स्थानीय सरकार र व्यवसायी बीच सहकार्य गरेर समस्या हल गर्न अर्थपूर्ण प्रयासको थालनी गरिने उनको भनाई छ ।

चितवन,२८ वैशाख ।

भरतपुर महानगरपालिकाले पनि सडक सफा गर्न ब्रुमर (धूलो बढार्ने मेसिन) सञ्चालन गरेको छ । महानगर प्रमुख रेणु दाहालले भरतपुरलाई स्वच्छ र हराभरा बनाउने अभियान अन्तर्गत सडक सफा गर्न ब्रुमरको प्रयोग गर्न थालिएको जानकारी दिइन् । सडकमा ब्रुमर चलेको तस्बिरसहित प्रमुख दाहालले सामाजिक सञ्जालमा लेखेकी छिन्–निर्माण सम्पन्न भएका सडकहरूमा महानगरले अब यसरी नै सडकको सरसफाइ लाई ध्यान दिनेछ ।