समाचार

माघ १३, चितवन । भरतपुर महानगरपालिका प्रमुख रेनु दाहालले बालबालिकाको क्षेत्रमा भरतपुर महानगरपालिका संवेदनशील रहेको बताउनुभएको छ ।
प्रहरी नागरिक साझेदारी अभियान नेपालको भरतपुर–५ मा शनिबार आयोजित दोस्रो साधारणसभा तथा पहिलो अधिवेशनलाई सम्बोधन गर्दै भरतपुर महानगरपालिका प्रमुख दाहालले महानगरपालिकाले बालबालिका क्षेत्रमा धेरै काम गर्दै आइरहेको उल्लेख गर्नुभयो ।
महानगरले बालबालिकालाई शिक्षाबाट बञ्चित नहुन परोस् भनेर अटिजम विद्यालय, पक्षघात भएकालाई भरतपुर २६ मा स्रोत केन्द्र सञ्चालनमा ल्याएको प्रमुख दाहालले बताउनुभयो ।
यस्तै बुवा–आमा नभएका बालबालिकालाई सडकसम्म नआउन दिन महानगरले एसओएस स्कुललाई सिफारिस गरी निःशुल्क अध्ययनको व्यवस्था मिलाउने गरी महानगर र विद्यालयबीच सम्झौता भएको उहाँले बताउनुभयो ।
प्रमुख दाहालले प्रहरी नागरिक साझेदारी अभियान नेपाल ९पिटुसिटु०ले सडकमा जोखिमपूर्ण अवस्थामा रहेका बालबालिकालाई उद्धार गरी पुनःस्थापन गर्ने काम गरेकोप्रति उच्च प्रशंसा गर्नुभयो ।
‘राज्यले एक्लै गर्नुपर्ने कार्य सबैको साथ सहयोगबाट भएको छ, उहाँले भन्नुभयो,‘भरतपुर महानगरबाट ठुलो सहयोग भएको छैन् । संवेदनशील र अवस्था अनुसार अझै बढी सहयोग गर्नुपर्छ ।यहाँहरु खुसी भएपनि म भने खुसी छैन ।’
प्रमुख दाहालले पिटुसिटुको विकासका लागि आगामी दिनमा महानगर तत्पर र अग्रसर रहने प्रविद्धता व्यक्त गर्नुभयो ।
महानगरपालिकाले पिटुसिटुमा रहेका विगत ३ वर्षदेखि वार्षिक रुपमा प्रति बालबालिका रु ४० हजार सहयोग गर्दै आईरहेको छ । नेपालमै पहिलो पटक प्रहरी नागरिक साझेदारीमा ७ वर्षअघि सञ्चालनमा ल्याएको केन्द्रमा हाल ९ जना बालबालिका आश्रित छन् ।
भरतपुर महानगरपालिकाले यहाँका सुधार गृह तथा पुनःस्थापना केन्द्रलाई नियमन गर्न उपप्रमुखको संयोजकत्वमा कार्यविधि र मापदण्ड निर्माण गरी काम गर्दै आइरहेको प्रमुख दाहालले जानकारी दिनुभयो ।
कार्यक्रमलाई सम्बोधन गर्दै नेपाल प्रहरीका महानिरीक्षक बसन्त बहादुर कुँवरले बालबालिकाहरु विश्वमै संवेदनशील र जोखिम मध्येको समूहमा पर्ने बताउनुभयो । पारिवारिक असम्झदारी, झगडा, कुनै देशबीच हुने युद्धका कारण सधै उच्च जोखिममा जाने हिंसा शोषण र दूरव्यवहार सहन बाध्य हुने गरेको उल्लेख गर्नुभयो । उनीहरु नबोलेर पीडा व्यक्त गर्न सक्दैनन् भने व्यस्कले जस्तो विरोध गर्न पनि नसक्ने उहाँको भनाइ छ । त्यसैले राज्यको नीति निर्माण गर्ने तह यो विषयमा गम्भीर हुन जरुरी रहेको महानिरीक्ष कुँवरले बताउनुभयो ।
पिटुसिटु कुनै पनि सडक बालबालिका सडकमा बस्न बाध्य हुन नपरोस् भन्ने उद्देश्यका साथ स्थापना गरिएको संस्था हो ।
कार्यक्रममा पिटुसिटु नेपालको स्थापना गर्न महत्वपूर्ण भूमिका निर्वाह गरेकोमा महानिरीक्षक कुँवरलाई साधारण सभा तथा अधिवेशनको अवसरमा सम्मान पनि गरिएको थियो । कार्यक्रममा संस्थाका कोषाध्यक्ष निर्देश सेढाईले आर्थिक प्रतिवेदन पेश गर्नुभएको थियो भने जिल्ला प्रहरी कार्यालय चितवनका प्रमुख रामेश्वर कार्कीले शुभकामना मन्तव्य व्यक्त गर्नुभएको थियो । कार्यक्रम संस्थाका अध्यक्ष बेलबहादुर गुरुङको अध्यक्षतामा सम्पन्न भएको हो ।

चितवन, १२ माघ । वीपी कोइराला मेमोरियल क्यान्सर अस्पताल जाने ७५ प्रतिशत बिरामीलाई निजी अस्पताल जान प्रोत्साहन गर्ने गरेको एक सर्वेक्षणले देखाएको छ । भ्रष्टाचार विरुद्ध अभियान चितवनले गरेको गरेको अध्ययन सर्वेक्षणमा अस्पतालको नियमित रुपमा कार्यचुस्तता सञ्चालन प्रति ८० प्रतिशतले अविश्वास व्यक्त गरेका हुन् । अस्पतालमा सेवा लिन आएका र सेवा लिएर फर्किएका एक सय जना सेवाग्राहीहरुसँग प्राप्त मतका आधारमा सर्वेक्षण तयार गरिएको अभियानले जनाएको छ । सर्वेक्षणमा सहभागी मध्ये शतप्रतिशतले अस्पतालका विभिन्न ठाउँमा एक पटकमा एक घण्टाभन्दा बढी समय लाईनमा बस्नु परेको जनाएका छन् । सेवा लिन जाँदा कर्मचारी, डाक्टर, नर्सको व्यवहारप्रति ८० प्रतिशतले असन्तुष्टि जनाएका छन् भने २० प्रतिशतले ठीकै भन्ने जनाएका छन् । सन्तुष्ट हुने एक जना पनि छैनन् । समग्रतामा ७५ प्रतिशत बिरामी अस्पतालप्रति असन्तुष्ट भेटिए भने २५ प्रतिशतले ठीकै भन्ने जवाफ दिए । अस्पतालप्रति सन्तुष्ट हुनेको संख्या पनि शुन्य रह्यो ।

यसैगरी मध्यस्तकर्ता वा कार्यालयकै कर्मचारीको सहयोगमा सेवा लिने ६० प्रतिशत, नेता र ठूलाबडाको सहयोगमा २० प्रतिशत र कसैको सहयोग नलिईकन सेवा लिनेको संख्या केवल २० प्रतिशत मात्रै रहेको उक्त सर्वेक्षणले देखाएको छ । सर्वेक्षणमा सहभागी मध्ये अस्पतालको काम गर्ने प्रणाली र प्रक्रिया जटिल रहेको ४० प्रतिशतले बताएका थिए भने ठीकै छ भन्ने ६० र अति सरल छ भन्ने मान्छे भेटिएन् । अस्पतालले आम्दानी खर्चको विवरण सूचना पार्टीमा टाँसेको हुनु पर्नेमा यस्तो नभेटिएको उक्त सर्वेक्षणले देखाएको छ ।

सर्वेक्षणमा अस्पतालका कमजोर पक्ष र सुधार गर्नुपर्ने पक्षहरु केलाईएको छ । जसमा अस्पतालको आवास गृहमा व्यापक अनियमितता भएको, गैंडाकोटमा भएको गेष्टहाउसको अवस्था दयनीय बन्दै गएको, अस्पतालमा भएका मेसिनहरु बिग्रियो भनेर लामो समयसम्म बन्दैन भन्ने गरेको र निजी अस्पतालहरुमा जान बाध्य बनाईएको उल्लेख छ ।

यसैगरी समयमै रिपोर्ट नआउने गरेको, बिरामीले प्रयोग गर्ने भनी ल्याईएको औषधिहरु हराउने गरेको, अस्पतालभित्रका सामग्रीहरुको दुरुपयोग हुने गरेको प्रतिवेदनमा औल्याईएको छ ।

वीपी कोइराला मेमोरियल क्यान्सर अस्पतालले आयोजना गरेको सार्वजनिक सुनुवाई कार्यक्रममा समन्वयकर्ता संस्था भ्रष्टाचार विरुद्ध अभियान चितवनले उक्त प्रतिवेदन प्रस्तुत गरेको हो । सो क्रममा सहभागीहरुले अस्पतालप्रति गुनासै गुनासा गरेका थिए । नेपाली कांग्रेसका स्थानीय नेता बिनोद ढकालले आवास भवन राजनीतिक शक्तिको आडमा दुरुपयोग भएको आरोप लगाउनुभयो । उहाँले भन्नुभयो “अस्पतालबाट जागिर छोडेको १० वर्षसम्म पनि आवासमै बसेका छन् ।” उहाँले होटलमा कार्यक्रम र बैठक गरेर रक्सीको समेत बिल बनाएर आउने गरेको गम्भीर आरोप लगाउनुभयो । उहाँले प्रश्न गर्दै भन्नुभयो “अस्पतालको कार्यसमितिको, पदाधिकारीको बैठक होटलमा बसेर रक्सीको बिल अस्पतालको आर्थिक शाखामा पेश गरेर भुक्तानी गरिएको छ, यसको जिम्मेवार को ?” उहाँले पेट्रोलको कुपन शक्तिको आडमा वितरण गर्ने गरिएको भन्दै सार्वजनिक गर्न चुनौती दिनुभयो ।

भरतपुर ९ का रास्वपा नेता यज्ञराज पौडेलले पब्लिक रिपोर्ट कार्डका आधारमा अस्पताल फेल भएको बताउनुभयो । उहाँले चिकित्सकहरु निजी अस्पताल धाउने परिपाटीको अन्त्य गर्नुपर्नेमा जोड दिनुभयो । उहाँले यहाँका उपकरण बिग्रिएको देखाएर बाहिर परीक्षण गर्न पठाउने गरेको बताउनुभयो ।

सेवा निवृत्ति नर्स सीता ज्ञवालीले डाक्टर, कर्मचारी र एम्बुलेन्स चालकलाई कमिसन आउँछ भनेर पुरानो मेडिकल कलेजमा बिरामी लैजाने गरेको बताउनुभयो । उहाँले आफू विगतमा सोही अस्पतालमा कार्यरत रहेको भन्दै कमिशनको परिपाटी रहेको बताउनुभयो । चितवन २ का सांसद रवि लामिछानेको सचिवालयका हेमन्त बरालले अस्पताललाई पेपरलेस बनाउनु पर्नेमा जोड दिनुभयो । उहाँले अस्पतालभित्र कहाँ कसरी सेवा लिने भन्ने बारेमा जानकारी दिन सेवा केन्द्र सञ्चालन गर्नुपर्ने सुझाव दिनुभयो ।

भरतपुर ४ का शालिग्राम आचार्यले अस्पतालभित्रका कर्मचारीहरु आफ्नो पार्टीको नेतृत्व आउँदा खुशी हुने गरेको भन्दै अस्पतालभित्रै कर्मचारीबीच सत्तापक्ष र प्रतिपक्ष जस्तो व्यवहार गरिने गरेको बताउनुभयो । भरतपुर २ का नवराज ढकालले अस्पतालप्रति उठेका प्रश्नहरुको झाराटार्ने खालको जवाफ आउने गरेको बताउनुभयो ।

स्थानीय इन्द्रप्रसाद रिजालले मेमोग्राफ मेसिन विगत डेढ वर्षदेखि बिग्रिएको भन्दै तीन वटा सिटी स्क्यान एकै पटक बिग्रने गरेको बताउनुभयो । बायोस्पीको रिपोर्ट आउन तीन महिना कुर्नुपर्ने बाध्यता रहेको चर्चा गर्दै उहाँले छिटो हुने व्यवस्था गर्न आग्रह गर्नुभयो ।

दीपक ढकालले बीमाको औषधि अस्पतालभित्र नपाईने गरेको भन्दै महंगो औषधि भित्र भए पनि बाहिर किन्न पठाउने गरेको गुनासो गर्नुभयो ।

आमाको उपचारमा आउनु भएका माडीका शिव पाठकले अस्पतालभित्र एक सय रुपैयाँको औषधि किन्न ३० रुपैयाँको फोटोकपी गर्नुपर्ने बाध्यता रहेको भन्दै बीमाको औषधि पाउनै मुस्किल रहेको बताउनुभयो ।

उठेका प्रश्नहरुको जवाफ दिंदै अस्पतालका कार्यकारी निर्देशक डा.शिवजी पौडेलले आवासका ३४ वटा कोठा खाली गरेको भन्दै अर्को हप्तासम्ममा बरिष्ठता र आवश्यकताका आधारमा वितरण गरिने बताउनुभयो । उहाँले त्यसपछि पनि कहाँ नेर कमजोरी भए हेरिने बताउनुभयो ।

मेसिनहरु समय समयमा बिग्रन गरेको भन्दै उहाँले भन्नुभयो “मेसिनरी हो बिग्रन्छ ।” नबिग्रीकन बिग्रेको भनेर बिरामी बाहिर नपठाईएको उहाँको दावी छ । सबैभन्दा बढी गुनासो कर्मचारीको बोली र व्यवहारमा आउने गरेको भन्दै उहाँले यसलाई सुधार्न कर्मचारीहरुलाई निर्देशन दिनुभयो । उहाँले क्षमताभन्दा बढी बिरामी हुँदा चुस्त सेवा दिन नसकिएको भन्दै उहाँले भन्नुभयो “हामी क्षमता बढाउने तयारीमा छौं ।” प्रयोगशाला परीक्षणको रिपोर्ट लिन नयाँ मेसिन आजैबाट जडान गरिएको भन्दै उहाँले अब लामो लाईन बस्नु नपर्ने बताउनुभयो ।

कार्यक्रममा अस्पतालका अध्यक्ष डा. विजयराज न्यौपाने, उपनिर्देशक डा। उमेश नेपाल लगायतले बोल्नु भएको थियो । कार्यक्रममा अस्पताल सञ्चालक समितिका सदस्यहरु, कर्मचारी, नर्स, डाक्टर लगायत सर्वसाधारणको उपस्थिति रहेको थियो ।

चितवन,माघ ११ ।

चितवन राष्ट्रिय निकुञ्जले गैँडालाई गोली हानी मारेको आरोपमा एक जनालाई पक्राउ गरेको छ । पक्राउ पर्नेमा पूर्वी चितवनको राप्ती नगरपालिका वडा नं ६ का टीकाराम बोहोरा भन्ने खेसरबहादुर बोहोरा रहेका छन् । उनलाई तीन वर्षपछि पक्राउ गरिएको हो । निकुञ्जका सूचना अधिकारी गणेशप्रसाद तिवारीका अनुसार बोहोरालाई माघ ९ गते हेटौँडा उपमहानगरपालिका वडा नं २ चौकीटोलबाट पक्राउ गरिएको थियो । विसं २०७६ भदौ ३१ गते नवलपरासीको अमलटारी क्षेत्रमा गैँडा मारी खाग काटेर लगेको र विसं २०७७ कात्तिक २० गते निकुञ्जको भोसाराघाटको आइल्याण्ड क्षेत्रमा गैँडालाई गोली हानी मारेर खाग काटी लगेको आरोपमा उनलाई पक्राउ गरिएको हो । ती घटनामा बोहोरासहित अन्य २४ जना प्रतिवादी रहेको सूचना अधिकारी तिवारीले जानकारी दिनुभयो । उक्त घटनामा संलग्न बोहोरासहित २१ जना पक्राउ परिसकेका छन् भने अन्य तीनजना फरार रहेका छन् । पक्राउ परेका बोहोरालाई बुधबार चितवन जिल्ला अदालतमा पेस गरिएको उहाँले बताउनुभयो ।