समाचार

तस्वीर ः कोमलचन्द्र भगत

चितवन, २४ फागुन । क्यान्सर रोगका कारण युवा उमेरमै स्वर्गारोहण हुनु भएकी दन्तरोग विशेषज्ञ डा. बिएम खरेल लामिछानेको स्मृतिमा क्यान्सर सचेतना सम्बन्धी लेखनवृत्ती कोष स्थापना गरिएको छ । प्रस्तावित बिएम फाउण्डेशन र नेपाल पत्रकार महासंघ चितवन शाखाबीच आज ( बुधबार ) सम्झौतामा हस्ताक्षर भएको हो । प्रस्तावित फाउण्डेशनका तर्फबाट एलाईभ हस्पिटल एण्ड ट्रमा सेन्टरका सञ्चालक डा. प्रमोद लामिछाने र महासंघका तर्फबाट अध्यक्ष नारायण अधिकारीले सम्झौतामा हस्ताक्षर गर्नुभएको छ । सम्झौतामा तत्काल रु. ५ लाख रुपैंया बीउ पूँजीको अक्षयकोष निर्माण गर्ने उल्लेख छ । वार्षिक रुपमा अक्षयकोषबाट प्राप्त व्याज रकममा थप गरी प्रत्येक वर्ष रु. १ लाखको लेखन वृत्ति रकम खर्च गरिने जनाईएको छ । सम्झौता कार्यक्रममा बोल्दै लामिछानेले अक्षयकोषमा क्रमशः रकम बृद्धि गरी रु.२० लाख पु¥याउने लक्ष्य रहेको बताउनुभयो । व्याज र लामिछाने परिवारले थप्ने रकमबाट पत्रकारहरुलाई क्यान्सर सचेतना सम्बन्धी लेखन वृत्ति प्रदान गरिने छ । संकलित लेखहरुलाई समावेश गरेर प्रत्येक वर्ष फाउण्डेशनले पुस्तक प्रकाशन गर्ने छ । अधिकांश क्यान्सर रोग समयमै पत्ता लगाएर उपचार गरे निको पार्न सकिने सचेतना फैल्याएर अरुले पनि अकालमै ज्यान गुमाउन नपरोस् भन्नका लागि कोष स्थापना गरी पत्रकारहरुलाई प्रोत्साहन गरिएको डा.प्रमोद लामिछानेले बताउनुभयो ।

लेखन वृत्ति सम्बन्धी कार्यविधि महासंघले बनाउने जिल्ला अध्यक्ष अधिकारीले जानकारी दिनुभयो । महासंघले पछिल्लो समय लेखन वृत्तिका लागि अन्य निकायहरुमा पनि पहल गर्दै आएको छ ।

कार्यक्रममा डा. लामिछाने, अध्यक्ष अधिकारी, डा. लामिछानेका पिता कृष्णप्रसाद लामिछाने, स्व. बि एम खरेल लामिछानेकी दिदी सामाजिक व्यक्तित्व मिना खरेल, पत्रकार बिनोदबाबु रिजाल लगायतले बोल्नु भएको थियो ।

स्व खरेल लामिछाने र प्रमोद लामिछानेले भरतपुरमा हाडजोर्नी सम्बन्धी एलाईभ हस्पिटल एण्ड ट्रमा सेन्टर स्थापना गरी सञ्चालन हुँदै आएको छ । स्व. खरेल लामिछानेको पेट क्यान्सरका कारण तीन वर्ष अघि आजकै दिन ३७ वर्षको उमेरमा निधन भएको थियो ।

दन्त रोग विशेषज्ञ डा खरेल अलाइभ हस्पिटल एन्ड ट्रमा सेन्टरकी प्रबन्ध निर्देशक समेत हुनुहुन्थ्यो । उहाँका श्रीमान् डा प्रमोद लामिछाने हाडजोर्न तथा नसा रोग विशेषज्ञ हुनुहुन्छ ।

डा खरेललाई २०७४ बैशाख २८ गते क्यान्सर भएको पत्ता लागेको थियो । चौथो स्टेजको क्यान्सरको उपचारका लागि खरेललाई भारत, जापान लगायतका मुलुक समेत पु¥याईएको भए पनि निको बनाउन सकिएन ।

२४ फागुन, चितवन । बैंक तथा वित्तीय संस्थाका प्रमुखहरुलाई कालोमोसो दल्ने भनेर धम्की दिने दुर्गा प्रसाईंको ‘कालोमोसो दस्ता’का केन्द्रीय संयोजक शम्भु थापा पक्राउ परेका छन् । उनलाई मंगलबार दिउँसो जिल्ला प्रशासन कार्यालय चितवनबाट पक्राउ गरिएको प्रहरीले जनाएको छ । उनलाई सोधपुछका लागि नियन्त्रणमा लिइएको चितवनका प्रहरी प्रमुख रामेश्वर कार्कीले जानकारी दिए । धर्म, संस्कृति, राष्ट्र, राष्ट्रियता र नागरिक अभियानको नाममा गत फागुन १३ गते चितवनमा दुर्गा प्रसाईंले गरेको कार्यक्रममा थापालाई कालोमोसो दस्ताको केन्द्रीय संयोजक घोषणा गरिएको थियो । संयोजक बनेका थापाले बैंक तथा वित्तीय संस्थाका प्रमुखहरुलाई कालोमोसो दल्ने घोषणा गरेका थिए । प्रसाईं चितवन आएका दिन उनको नेतृत्वमा कालोमोसो लेखिएको टिसर्ट लगाएर युवाहरु परिचालन गरिएको थियो ।

थापाको अभिव्यक्तिले बैंक तथा वित्तीय क्षेत्रमा एक प्रकारको त्रास सिर्जना भएकाले उनलाई पक्राउ गरिएको प्रहरी प्रमुख एसपी कार्कीले बताए । बैंक तथा वित्तीय संस्थाका प्रमुखहरु जिल्ला प्रशासन कार्यालयमा डेलिगेससमेत गएका थिए । बैंकर्सहरुले थापाको धम्कीपूर्ण अभिव्यक्तिले सबैतिर प्रभाव पार्ने देखिएकाले पक्राउ गर्न दबाव दिएका थिए । उनीमाथि अभद्र व्यवहारको मुद्दा दर्ताको तयारी गरिएको छ ।

भरतपुर, २४ फागुन ।
बिहानैदेखि चितवनको मौसममा आंशिक बदली देखिएको छ । जिल्लाका सबै पालिकामा बिहानपख छिटफुट वर्षा भए पनि ठूलो पानी पर्न सकेको छैन । अहिले मुलुकका पहाडी भूभागमा वर्षा भइरहेको छ । आज बिहानैबाट काठमाडौंसहित देशभरका पहाडी भूभागमा वर्षा हुँदा जनजीवन सामान्य प्रभावित बनेको हो । पश्चिमी वायुको सामान्य प्रभावका कारण वर्षा भएको हो । हाल सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेश लगायत देशको पहाडी भू–भागमा आंशिकदेखि सामान्य बदली रही बाँकी भू–भागमा मौसम सामान्यतया सफा रहेको जल तथा मौसम विज्ञान विभागले जनाएको छ । आज दिउँसो देशका पहाडी भू–भागमा आंशिकदेखि सामान्य बदली रही बाँकी भू–भागमा आंशिक बदलीदेखि मौसम सामान्यतया सफा रहनेछ । देशका पहाडी भू–भागका थोरै स्थानहरुमा मेघ गर्जनरचट्याङसहित हल्कादेखि मध्यम वर्षाको सम्भावना रहेको छ । वर्षाका कारण जनजीवन प्रभावित हुनुका साथै मौसम सफा नहुँदा आन्तरिक उडानसमेत प्रभावित बनेको छ ।