समाचार

फागुन १४, रत्ननगर । चितवनका पर्यटन व्यवसायीहरुको संस्था क्षेत्रीय होटल संघ चितवन सौराहाको १८औं साधारण सभा तथा नबौं अधिवेशन आइतवार देखि सुरु भएको छ । सौराहामा आयोजना गरिएको साधारण सभा तथा अधिवेशनको होटल संघ नेपालका केन्द्रीय उपाध्यक्ष विनय शाहले उद्घाटन गरेका छन् । अधिवेशनले आगामी दुई बर्षे कार्यकालको लागि नयाँ नेतृत्व चयन गर्ने छ । संघको अध्यक्षमा सौराहाका स्थापित व्यवसायी गंगा गिरीको नाम चर्चामा रहेको छ । संघको कार्यसमिति सदस्य, कोषाध्यक्ष हुँदै बर्तमान कार्यसमितिका उपाध्यक्ष समेत रहेका गिरीलाई अध्यक्षमा सर्बसम्मत गराउने गरी व्यवसायीहरुले छलफल गरेका छन् । अधिवेशनले अध्यक्ष सहित बरिष्ठ उपाध्यक्ष, २ जना उपाध्यक्ष,एक महासचिव, एक कोषाध्यक्ष र १५ जना सदस्य गरी २१ सदस्यीय नयाँ कार्यसमिति चयन गरिने संघका महासचिव गुणराज थपलियाले जानकारी दिए । आइतबार साधारण सभा तथा अधिवेशन उद्घाटन गरी सोमबार बन्दसत्र मार्फत नयाँ कार्यसमिति चयन गर्ने कार्यतालिका रहेको छ । सर्बसम्मत नयाँ कार्यसमिति चयन गर्ने गरी व्यवसायीहरु आन्तरिक रुपमा सहमति नजिक रहेको बुझिएको छ । उद्घाटन कार्यक्रमका प्रमुख अतिथि होटल संघ नेपालका उपाध्यक्ष शाहले राज्यले पर्यटन व्यवसायलाई उद्योगको मान्याता दिन नसकेको बताए । कोरोनाको महामारीका कारण थलिएको पर्यटन व्यवसाय अझै उठ्न नसकेको भन्दै उनले पर्यटन व्यवसायको विकासको लागि राज्य उदासीन रहेको बताए । सरकारको बैङ्किङ नीतिको कारण व्यवसायी चर्को व्याजदरको मारमा परेको उनको भनाई छ । कालिका नगरपालिकाका मेयर विनोद रेग्मीले कालिका नगरपालिकाको पर्यटन विकासको लागि सौराहाका पर्यटन व्यवसायीसंग सहकार्य गर्न तयार रहेको बताए । क्षेत्रीय होटल संघका अध्यक्ष दीपक भट्टराईले कोरोना महामारीका कारण बार्षिक चार लाख पर्यटक भित्र्याउने योजना असफल भएको बताए । कार्यक्रममा पत्रकारिता मार्फत चितवनको पर्यटन विकासमा खेलेको भूमिकाको कदर गर्दै पत्रकार कोमलचन्द्र भगतलाई सम्मान गरिएको थियो । कार्यक्रममा वडा नं ६ का वडाध्यक्ष किरण चौधरी, क्षेत्रीय होटल संघ चितवनका निर्वतामान अध्यक्ष सुमन घिमिरे, रत्ननगर उद्योग बाणिज्य संघका बरिष्ठ उपाध्यक्ष शंकर गिरी, बाघमारा मध्यवर्ती सामुदायिक वनका अध्यक्ष जितु तामाङ,चितवन उद्योग संघका उपाध्यक्ष गजेन्द्र अधिकारी, क्षेत्रीय होटल संघ भक्तपुरका अध्यक्ष सत्यराज खनाल लगायतले मन्तव्य राखेका थिए । उपाध्यक्ष अन्जनकुमार पाण्डेले स्वागत मन्तव्य राखेको कार्यक्रम महासचिव गुणराज थपलियाले सञ्चालन गरेका थिए । संघमा ६१ जना व्यवसायी आबद्ध छन् ।

फागुन १२, भरतपुर । राजमार्गमा तरकारी फालेर गरिएको आन्दोलनको सुनुवाइ नभएको भन्दै चितवनका किसानहरूले शुक्रबार दोस्रो चरणको आन्दोलन सुरू गरेका छन्। किसानका मागहरू सम्बोधन गर्न दबाबका लागि कृषि औजारसहित सडकमा आएर प्रदर्शन गरेका छन् । अघिल्लो आन्दोलन प्रति सरोकार निकायले चासो नदेखाएको भन्दै दोस्रो चरणको आन्दोलन गर्नुपरेको किसान संघर्ष समिति चितवनका संयोजक लेखनाथ भुषालले जानकारी दिनुभयो। केन्द्रीय बस टर्मिनल भरतपुरमा कृषि औजारसहित भेला भएका किसानहरू जिल्ला प्रशासन कार्यालय, बाइपास रोड, कृषि ज्ञान केन्द्र, चौबिसकोठी हुँदै नारायणगढको पुल्चोक पुग्ने भुषालले जानकारी दिनुभयो । चितवनसहित अन्य विभिन्न जिल्लाका किसानहरू सरकारले दिएको किसान परिचयपत्रसहित प्रदर्शनमा आएका छन् । किसानले उठाएका मागहरू सम्बोधनका लागि आश्वासनमात्र आएकाले कार्यान्वयनमा दबाब दिन दोस्रो चरणको आन्दोलन गर्नु परेको भुषालको भनाई छ । नेपालमा पर्याप्त उत्पादन हुने तरकारी, फलफूल भारतबाट आयात नगर्न, रासायनिक मल सहज रूपमा पाउने व्यवस्था गर्न, मलमा भइरहेको कालोबजारी रोक्न, किसानले पाउने अनुदानमा गरिएको कटौतीको निर्णय फिर्ता लिन किसानले माग गरेका छन्। उनीहरूले किसानले उठाएका दस बुँदे मागहरूलाई नीतिगत रूपमा कार्यान्वयन गर्न दबाब दिँदै आएका छन्। गत माघ २० गते किसानहरूले नारायणगढको पुल्चोकस्थित पूर्व(पश्चिम राजमार्गमा तरकारी फालेर किसान आन्दोलनको घोषणा गरेका थिए। किसान आन्दोलनका अगुवा अरविन्द्र सुवेदीले आगामि दिनमा वार्ता र आन्दोलन सँगसँगै अघि बढाउने बताए। उनले मागको सुनुवाइ नभए देशभरका किसान काठमाडौं पुगेर सिंहदरबार घेर्ने बताए।