समाचार

फागुन ११, भरतपुर ।

 भरतपुर महानगरपालिका–११ गणेशस्थानमा छोराले मादक पदार्थ सेवन गरी दाउराले हानेर आफ्नै आमाको हत्या गरेका छन् । चितवन प्रहरीको अनुसन्धान अनुसार बुधबार राति ९ बजे ७८ वर्षीय आमा मिना कुमारी घलेलाई आफ्नै छोरा ४० वर्षको पुरन घलेले हत्या गरेका हुन् ।
मिना कुमारी आफ्नै घरको कोठामा टाउकोमा चोट लागी मृत अवस्थामा रहेको अवस्थामा प्रहरीले भेटेको थियो । जिल्ला प्रहरी कार्यालय चितवनबाट प्रहरी नायव उपरीक्षक विजयराज पण्डितको कमाण्डमा प्रहरी टोली घटनास्थलमा खटिएर लाशको मुचुल्का उठाएको थियो । आमा छोराबीच बिवाद हुँदा दाउरोले टाउकोमा प्रहार गरी हत्या गरेको खुल्न आएको प्रहरीले जनाएको छ । तत्काल घटना स्थलबाट फरार अभियुक्त पुरन घलेलाई खोजतलास गर्दा आज बिहीबार बिहान घर नजिकै रहेको चौरमा लुकिछिपी बसेको अवस्थामा फेला पारी प्रहरीले नियन्त्रणमा लिएको छ । चितवन जिल्ला अदालतबाट कर्तब्य ज्यानसम्बन्धी कसूरमा म्याद थप गरी अनुसन्धान भइरहेको प्रहरीले जनाएको छ ।

फागुन ११, भरतपुर । । भरतपुर महानगरपालिका प्रमुख रेनु दाहाल नेतृत्वको टोलीले बिहीबार नारायणी नदी किनार प्रर्दशनी मैदानको निरीक्षण गरेको छ ।
‘भरतपुर भ्रमण वर्ष २०८०’ को पूर्वसन्धयामा नारायणी नदी किनारमा निर्माणधिन ‘सि बिच मोडल’ को मेयर दाहाल नेतृत्वको टोलीले निरीक्षण एवम् अवलोकन गरेको हो ।
भरतपुर महानगरपालिका–१ स्थित नारायणी नदी किनारमा ‘सि बिच’ मोडलको तटबन्धको काम सुरु भएको छ । नदी किनारको ६५० मिटरको दुरीमा सिढि र चौतारीसहितको तटबन्धको काम सुरु भएको हो । त्यसको लागि आठ मिटरको ‘पाइल’ गाड्ने काम भइरहेको छ ।
निरीक्षणको क्रममा प्रमुख दाहालले  ‘सि बिच मोडल’ को भौतिक प्रगति, सर्वाजनिक जग्गामा बनेका अवैद्य संरचना, नारायणी नदी क्षेत्रमा रहेका व्यवसायको व्यवस्थितिकरण र सरसफाईको बारेमा चासो राख्नु भएको थियो ।
पछिल्लो समय नारायणी नदी किनारमा अब्यवस्थित व्यवसायहरुका कारण अस्तव्यस्त हुन थालेको भन्दै मेयर दाहालले चिन्तासमेत व्यक्त गर्नुभयो ।
भरतपुर महानगरपालिकाका प्रमुख दाहाल, उपप्रमुख चित्रसेन अधिकारी, पर्यटन विज्ञ, भरतपुर महानगरपालिकाका ईन्जिनियरसहित नारायणी नदी किनार पुगेको टोलीले भ्रमण वर्षलाई लक्ष्ति गरेर बाँकी भौतिक कार्यलाई तीब्र रुपमा अगाडि बढाउनुपर्ने निष्कर्ष निकालेको छ ।
नारायणी नदी किनारलाई ब्यवस्थित पर्यटकीय स्थलका रुपमा विकास गर्न हरियालीसहित ‘सि बिच मोडल’ लाई विभिन्न मन्त्रालयको बजेटमा सौन्दर्यकरणको काम भइरहेको छ ।
भरतपुर महानगरपालिकाले विस २०८० लाई भ्रमण वर्ष मनाउने गरी बृहत छलफल गरिरहेको छ । महानगरपालिकाले भरतपुरमा भईरहेको विकास र यहाँका पर्यटकीय गन्तव्यलाई देश, विदेशमा सन्देश फैल्याउने उद्देश्यसहित भ्रमण वर्ष मनाउन लागेको छ ।

किरात याक्थुङ चुम्लुङको २४ औँ राष्ट्रिय चुम्लुङ बैठक २५ बुंदे चितवन घोषणा पत्र जारी गर्दै सम्पन्न भएको छ । यहि फागुन ७ र ८ गते चितवनको भरतपुर भएको बैठकले किरात याक्थुङ चुम्लुङ, राष्ट्रिय चुम्लुङको २५ औँ बैठक इलामा गर्ने निर्णय गर्दै नेवाः ताम्सालिङ संस्थाका सङ्घीय अध्यक्ष प्रेम येक्तेन लिम्बूको अध्यक्षतामा सम्पन्न भएको हो । प्रदेश नं. १ का पूर्व प्रदेश प्रमुख प्रा.डा. गोबिन्द बहादुर तुम्बाहाङले २४ औँ राष्ट्रिय चुम्लुङको उद्घाटन गर्नुभएको थियो । राष्ट्रिय चुम्लुङमा पांचथर, इलाम, झापा, मोरङ, सुनसरी, तेह्रथुम, चितवन, ललितपुर, काठमाडौँ, भक्तपुर, संखुवासभा, ताप्लेजुङ र धनकुटा जिल्ला कार्य समितिहरू, लिम्बुवान प्रदेश समिति, नेवाः ताम्सालिङ प्रदेश समिति, विषयगत सङ्गठनहरू, थरगत तथा लिम्बुजन्य संस्थाहरू र विदेश स्थित किरात याक्थुङ चुम्लुङहरूबाट प्रतिवेदनहरू प्रस्तुत गरिएकोे थियो । उक्त चुम्लुङ बैठकमा संस्थाको
सङ्गठन तथा प्रगति प्रतिवेदन र आर्थिक प्रतिवेदन एवम् समसामयिक प्रस्तावहरू छलफल गरी पारित गरिएको थियो ।
किरात याक्थुङ चुम्लुङको २४ औँ राष्ट्रिय चुम्लुङ बैठक सफल पार्न क्रियाशील व्यवस्थापक जिल्ला कार्य समिति चितवन, लिम्बु विद्यार्थी मञ्च शाखा चितवन, जस्ना कन्स्ट्रक्सन चितवन, आर्थिक सहयोगदाताहरू, कियाचु सुनसरी जिल्ला कार्य समिति, कियाचु ललितपुर जिल्ला कार्य समिति, कियाचु हङ्कङ, होटल ग्लोबल, पूर्वेली समाज चितवन, पत्रकारहरू, उद्घाटन समारोहका प्रमुख अतिथि, विशिष्ट अतिथिहरू, अतिथिहरू, स्वयम्सेवकहरू, केलाःङ एवम्गायक कलाकारहरू, प्राविधिक सहयोगी गीता आले, सम्पूर्ण प्रतिनिधिहरू, पर्यवेक्षकहरू, उपस्थित अन्य महानुभावहरू सवैलाई यो राष्ट्रिय चुम्लुङ हार्दिक धन्यवाद ज्ञापन गरेको थियो ।