समाचार

भदौ ९, रत्ननगर । चितवनको पर्यटकीय नगरी सौराहामा भोली सोमबार हुने खानेपानी तथा सरसफाई उपभोक्ता महासंघ नेपालको राष्ट्रिय गोष्ठीमा खानेपानीमा कर लगाउने सरकारको तयारी र मुहान संरक्षणका विषयमा नीतिगत बहस हुने आयोजकले जनाएको छ । महासंघको २२औं स्थापना दिवसको अबसरमा आयोजना गरिएको गोष्ठीमा विज्ञहरुबाट कार्यपत्र प्रस्तुत हुनेछ । आयोजकले आइतबार पत्रकार सम्मेलनको आयोजना गरी खानेपानी तथा सरसफाइ क्षेत्रको सवाल र सामधान विषयक गोष्ठीको तयारी र उद्देश्यका बारेमा जानकारी गराएको हो । नेपाल सरकारका खानेपानी मन्त्री प्रदिप यादबले उद्घाटन गर्ने सो कार्यक्रममा केन्द्रीय समिति, प्रदेश समिति र जिल्ला समिति गरी २५० बढीको सहभागिता रहने महासंघका अध्यक्ष राजेन्द्र अर्यालले जानकारी दिए । स्थापना दिवसको अबसरमा खानेपानी र सरसफाईको क्षेत्रमा समाचार लेख्ने चार जना पत्रकारलाई महासंघले पत्रकारिता पुरस्कार प्रदान गर्नेछ ।

गोष्ठीमा अधिबक्ता दिलराज खनालले खानेपानी तथा सरसफाइको कानुनी व्यवस्था र उपभोक्ता संस्थाको नीतिगत पैरवीका सवालहरु, खानेपानी तथा सरसफाइ विज्ञ विनोद शर्माले खानेपानी तथा सरसफाइ दीगो विकासको लक्ष्यको स्थानीयकरण, खानेपानी तथा सरसफाइ विज्ञ छबी गौडेलले अन्तर विश्लेषण, आन्तरिक राजश्व कार्यालय भरतपुरका प्रमुख निरन भट्टराईले खानेपानीमा कर नीति सम्बन्धी कार्यपत्र प्रस्तुत गर्नेछन् । कार्यक्रममा महासंघका उपाध्यक्ष महासंघको संगठन र नीतिगत सवालबारे प्रस्तुतीकण गर्ने छन् । महासंघका अध्यक्ष अर्यालले खानेपानीमा आयकर लगाउने निर्णय सरकारको निर्णय फिर्ता हुनुपर्ने बताए । खानेपानी वितरणमा भोग्दै आएका अनेकौै समस्या सहित खानेपानीमा २५ प्रतिशत कर लगाउने विषयको औचित्यका बारेमा छलफल हुने बताए । खानेपानीको मुहान सुक्दै गइरहेको भन्दै उनले भविश्यमा हुने खानेपानीको अभावलाई मध्यनजर गरी अहिले नै नीतिगत सुधार गर्नुपर्ने बताए । खानेपानीको मुहान सुक्दै जादा खोला र भूमिगत पानी तानेर आपूर्ति गर्नुपर्ने अबस्था आउदै छ अध्यक्ष अर्यालले भने सरकारले विद्युत महसुल र इन्धनमा खानेपानी संस्थालाई सहुलीयत दिनुपर्छ । भावी पुस्काको लागि पानी जोगाउने दायित्व महासंघको काँधमा रहेको भन्दै उनले त्यसका लागि मुहान तथा स्रोतका संरक्षणका लागि कार्ययोजना सहित काम गर्ने बेला आएको बताए । रत्ननगर खानेपानी तथा सरसफाई उपभोक्ता संस्थाका अध्यक्ष तथा खानेपानी महासंघ रत्ननगरका अध्यक्ष माधव अर्यालले खानेपानी संस्थालाई विद्युत महसुलमा ५० प्रतिशत छुट दिनुपर्ने बताए । खानेपानी वितरणलाई सहज बनाउन सरकारसंग छुट मागिरेहका बेला राज्यले आयकर लिने नीति दिनु गलत भएको बताए । मुलुकभर ४५ हजार वटा खानेपानी तथा सरसफाई उपभोक्ता संस्था रहेका छन् । पत्रकार सम्मेलनमा रत्ननगर नगरपालिकाका उपमेयर यादब प्रसाद पाठकले खानेपानी तथा सरसफाई उपभोक्ता संस्थाबाट आयकर लिने सरकारको निर्णय व्यवहारिक नभएको तर्क गरे । उपभोक्ता संस्थाबाट सञ्चालिन खानेपानी संस्थाको सेवाक्षेत्र ८२ प्रतिशत र सरकारबाट सञ्चालित खानेपानी संस्थाको सेवा क्षेत्र १८ प्रतिशत रहेको महासंघले जनाएको छ । रत्ननगर खानेपानी सचिव प्रताप डल्लाकोटीले कार्यक्रम सञ्चालन गरेका थिए ।

भदौ ९, रत्ननगर । पूर्वी चितवनको रत्ननगर वडा नं ७ स्थित दुई वटा मुसहर बस्तीमा थप २० घरधुरीमा आइबार सुधारिएको चुलो वितरण गरिएको छ । सपना भिलेज सोसल इम्प्याक्टले मुसहर समुदायमा वनप्रतिको निर्भरता हटाउन र महिलाहरुको स्वास्थ्य सुरक्षाको लागि मालपुर र सिसुवार बस्तीमा सुधारिएको चुलो वितरण गरेको हो । केही समय अघि ३० घरधुरीलाई चुलो वितरण गरिएकोमा आइतबार थप २० घरधुरीलाई सुधारिएको चुलो प्रदान गरिएको हो । वडा नं ७ का वडाध्यक्ष सजना महतो, वडा सदस्य राजु आचार्य र इम्प्याक्टका अध्यक्ष ध्रुव गिरीले चुलो हस्तान्तरण गरेका थिए । सो अबसरमा वडाध्यक्ष महतोले सुधारिएको चुलोले महिलाहरुको स्वास्थ्यमा पर्ने प्रतिकुल असर कम हुने विश्वास व्यक्त गरे । धुँवाबाट लाग्ने रोगले मुसहर महिलाहरु ग्रसित हुने गरेको भन्दै उनले सुधारिएको चुलो प्रयोग गर्दा धुवा कम आउने महिलाहरु रोगको सिकार हुनुनपर्ने बताए । उनले मुसहर समुदायको जीवन स्तर उकास्न प्रर्वधनात्मक तथा सीपमुलक कार्यक्रमलाई जोड दिएको उनको भनाई छ । इम्प्याक्टका अध्यक्ष गिरीले समुहर समुदायको स्वास्थ्य जोगाउन सुधारिएको चुलो वितरण तथा प्रयोगमा जोड दिएको भन्दै दाउरा लिन जंगल जादा हुने जोखिम घटाउन, स्वास्थ्य जोगाउन र वनप्रतिको निर्भरता हटाउन सुधारिएको चुलो वितरण गरिएको बताए । मुसहर समुदायको जीवन स्तर उकास्न सामुहिक तरकारी खेती, साबुन उत्पादनमा महिलालाई रोजगारी तथा सुधारिएको चुलो निर्माणमा समेत मुसहर समुदायलाई रोजगारी प्रदान गरिएको उनले बताए । ग्यास खरिद गर्न नसक्ने अबस्था रहेका समुदायलाई चुलो वितरणको लागि उद्योग स्थापना गरेर उत्पादन सुरु गरेको बताए । सपनाका घरहरु परियोजना अन्तर्गत चितवन जिल्लामा विपन्न समुदायका लागि ४५ वटा घर निर्माण गरिएको इम्प्याक्टका कार्यक्रम निर्देशक सुजन बस्नेतले जानकारी दिए ।

चितवन, भदौ ८ । तस्विर कोमल चन्द्र भगत ।

नेपाल नेत्रज्योति सङ्घ चितवनद्वारा सञ्चालित भरतपुर आँखा अस्पतालको सेवा थप प्रभावकारी बनाइने भएको छ । नेपाल नेत्रज्योति सङ्घ चितवनको २४औँ वार्षिक साधारणसभामा सङ्घका केन्द्रीय अध्यक्ष प्रा डा चेतराज पन्तले सबै दृष्टिकोणले यस अस्पताललाई आँखा उपचारको केन्द्रको रुपमा विकास गर्न उपयुक्त हुने बताउनुभयो । “यहाँ दुई मेडिकल कलेज, एउटा क्यान्सर अस्पताल र सङ्घीय अस्पताल रहेको छ, भरतपुर ‘मेडिकल सिटी’को रुपमा विकास भइरहेको छ”, उहाँले भन्नुभयो । देशकै मध्यभागमा रहेकाले उक्त अस्पताललाई आँखा उपचारको प्रमुख केन्द्रको रुपमा विकास गर्नु आवश्यक भएको उहाँको भनाइ थियो । चिकित्सा विज्ञान राष्ट्रिय प्रतिष्ठानका डीन डा आषेश ढुङ्गानाले प्रतिष्ठानले नेपाल नेत्रज्योति सङ्घसँगको सहकार्यमा काठमाडौँ उपत्यका बाहिर तीन स्थानमा कार्यक्रम सञ्चालन गर्दै आएको बताउननुभयो । विराटनगर, भैरहवा र चितवनमा कार्यक्रम सञ्चालन हुँदै आएको जानकारी दिँदै उहाँले यसलाई अझै प्रभावकारी बनाउँदै लैजान आवश्यक भएको उहाँले उल्लेख गर्नुभयो ।

कार्यक्रममा भरतपुर महानगरपालिका–१० का अध्यक्ष परमेश्वर खनाल, नेपाल नेत्रज्योति सङ्घ नवलपुरका सभापति होमनाथ जैशी, सङ्घकी सदस्य मिना खरेललगायतले सङ्घको गतिविधिबारे जानकारी गराउनुभएको थियो । कार्यक्रममा सङ्घका सचिव केशवप्रसाद अधिकारीले वार्षिक प्रतिवेदन पेस गर्दै सङ्घद्वारा सञ्चालित अस्पताल र उपचार केन्द्रबाट गत एक वर्षमा तीन लाख ४९ हजार पाँच सय ४६ जनाको आँखाको उपचार गरेको जानकारी दिनुभयो । तीमध्ये ११ हजार दुई सय ५७ जनाको आँखाको शल्यक्रिया गरिएको थियो । रासस