समाचार

चितवन । सिमलताल पहिरोमा परेको बससंगै त्रिशूली नदीमा हराएका माडी-१ भंगेताका विकास परियारको दुःखद् मृत्यु भएको छ ।

शनिबार गैंडाकोट नगरपालिका-७ गैह्रीस्थित नारायणी नदीको बिच भागको टापुमा फेला परेको दुईमध्ये एक शव परियारको रहेको पहिचान भएको हो ।

मृतकको दाजु विजय परियारले शवको सनाखत गर्नुभएको हो । परियारको शव हाल भरतपुर अस्पतालको शव गृहमा राखिएको र पोष्टमार्टम हुन बाँकी रहेको विजयले जानकारी दिनुभयो ।

फ्रिल्यान्सर फोटोग्राफीको काम गर्दै २२ बर्षीय दिवंगत विकास परियार असार २८ गते काठमाडौंमा हुने एक विवाह समारोहको फोटो खिँच्न असार २७ गते राती करीब ११ बजे भरतपुर सारदानगरका एक सहकर्मी फोटोग्राफर सुदीप बिक सहित भरतपुर विशालचोकबाट बागमती प्रदेश १५१६ नम्बरको एञ्जल डिलक्स बस चढेका थिए ।

परियारले बरुवास्थित सोमेश्वर मा.वि.बाट कक्षा १२ उत्तीर्ण गरेका थिए । हालै विवाह भएका उनको परिवार माडी-१ भंगेता गाउँमा बस्दै आएको छ । परियारको दुःखदु मृत्यु भएसंगै उनको परिवार, आफन्त र छिमेकसंगै समग्र माडी क्षेत्र शोकमा परेको छ ।

३० असार, चितवन । पूर्वी नवलपरासीको गैंडाकोट नगरपालिका ७ स्थित नारायणी नदी किनारमा एक पुरुषको शव फेला परेको छ । जिल्ला प्रहरी कार्यालय चितवनका अनुसार पुरुषको शव खोलाबाट निकालेर भरतपुर ल्याउने तयारी गरिएको छ । सिमलताल पहिरोमा परेका बसका यात्रुको शव हुन सक्ने आशंका गरिएको छ । शनिबार पनि सोही ठाँउ नजिकै दुईवटा शव भेटिएका थिए । अहिलेसम्म नारायणी नदीले बगाएका ५ वटा शव फेला परेका छन् । आज बिहानमात्रै एक जनाको शव फेला परेको थियो । शनिबार तीनको शव फेला परेको थियो । उनीहरूको सनाखतसमेत भइसकेको छ ।

२८, असार, चितवन । चितवनको भरतपुर महानगरपालिका २९, सिमलतालमा पहिरोमा परेर दुई बससँगै बेपत्ता यात्रुहरुको खोजीका लागि आएका आफन्तलाई चितवनका होटलहरुले निःशुल्क खाना खुवाउने भएका छन् ।

होटल व्यवसायी संघ चितवनले पहिरोमा परेर बससँगै बेपत्ता भएकाहरुको खोजीका लागि आएकाहरुलाई निःशुल्क खाना खुवाउने विज्ञप्ति निकालेर जानकारी दिएको छ । पहिरोमा परेर बेपत्ता भएकाहरुको उद्धारमा सहयोग पुर्‍याउने उद्देश्यले उक्त निर्णय गरेको संघका अध्यक्ष लोकनाथ भट्ट कृष्णले जानकारी दिए । पहिरोमा परेर बेपत्ता भएका आफन्तको खोजी कार्यको लागि आउँदा खानरबस्न समस्या नहोस् भन्ने उद्देश्यले जिल्लाका विभिन्न होटलमा निस्शुल्क खान बस्नको व्यवस्था गरिएको भट्टले जानकारी दिए ।