समाचार

फागुन २०, चितवन । भरतपुर महानगरपालिकाले घोषणा गरेको भरतपुर भ्रमण वर्ष–२०२४ को अवसर पारेर नेपाल आदिवासी जनजाति महासङ्घ जिल्ला समन्वय परिषद् चितवनले आदिवासी जनजाति सांस्कृतिक तथा व्यापारिक महोत्सव–२०८०’ आयोजना गर्ने भएको छ। परिषदका अध्यक्ष महेन्द्र दुराले आउँदो चैत ९ देखि १८ गतेसम्म नारायणी नदी किनारमा ‘महासङ्घले पहिलोपटक महोत्सव आयोजना गर्न लागेको जानकारी दिए। आदिवासी जनजाति समुदायको संस्कृति र जातीय पहिचानलाई जानकारी गराउन महोत्सव आयोजना गर्न लागिएको उनको भनाइ छ। भेषभूषा र खानपानसँगै मञ्चमा हुने गतिविधिमार्फत आदिवासी जनजातिलाई केन्द्रमा राखेर काम लागिएको दुराले बताए । महासङ्घका सचिव रामबहादुर भुजेलका अनुसार नारायणी नदी किनारमा हुने महोत्सवमा कम्तीमा दुई सयभन्दा बढी व्यापारिक प्रदर्शनी कक्ष रहने छ। कम्तीमा दुई लाख दर्शकलाई महोत्सव अवलोकन गराउने गरी तयारी थालिएको भुजेले बताए।

चितवनमा थारू, चेपाङ, तामाङ, गुरुङ, मगर, नेवार, कुमाल, दरै, दुरा, थकाली, ह्योल्मो, राई, लिम्बू, भुजेलसहित १७ आदिवासी जनजाति समुदाय बसोबास गर्दछन्। ती सबैलाई एकै ठाउँमा समेटिने गरी महोत्सव आयोजना गर्न लागेको महासङ्घका सचिव भुजेलले जानकारी दिए। प्रदर्शनीमा स्थानीय उत्पादनको प्रवर्द्धन तथा बिक्रीवितरण, कृषि, जडीबुटी तथा खनिजजन्य उत्पादनको प्रदर्शन र बिक्रीवितरण गरिने छ । महोत्सवको लागि महासंघले स्टल बुकिङसमेत खुला गरिसकेको छ। भरतपुर भ्रमण वर्ष २०२४ को अवसरमा हुन गइरहेको यस महोत्सवको संरक्षक भरतपुर महानगरपालिका रहेको छ।

फागुन २०, चितवन ।
रत्नगर नगरपालिका–१० स्थित शिशु निकेतन माविको छात्राबासमा मृत अवस्थामा भेटिएकी १४ वर्षीया शालिन पोखरेलको ‘झुण्डिएको कारण’ मृत्यु भएको पोष्टमार्टम रिपोर्टले देखाएको छ । । त्रिवि शिक्षण अस्पतालमा गरिएको पोस्टमार्टममा बलात्कार वा यौनजन्य अपराधका कुनै संकेत नभेटिएको स्रोतले बताएको छ । गत फागुन १२ गते विद्यालयको छात्रावासको कोठामा शालिन मृत अवस्थामा भेटिएकी थिइन् । उनको शव पोस्टमार्टमका लागि भरतपुर अस्पताल लगिएको थियो । तर, परिवारले अस्पतालको विश्वास नभएको भन्दै दबाब दिएर शव त्यहाँबाट निकालि प्रहरीको रोहबरमा काठमाडौं लगिएको थियो ।

त्रिवि अस्पतालले आज पोस्टमार्टम रिपोर्ट प्रहरीलाई पठाएको स्रोतले बतायो । रिपोर्टमा मृत्यूको कारण ह्याङ्गिङ (झुण्डिएर) भनिएको छ । यसले आत्महत्यातर्फ संकेत गर्छ । प्रहरीको प्रारम्भिक अनुसन्धानले पनि आत्महत्या भएको देखाएको छ । तर, परिवारले शंका गर्दै गम्भीर छानबिनको माग गरेको थियो ।

फागुन २०, चितवन ।

भरतपुर भ्रमण वर्ष २०२४ को उल्लासमय वातावरणमा उद्घाटनले आर्थिक क्षेत्र चलायमान हुने आशा जगाएको छ ।आर्थिक मन्दीले थलिएको व्यवसायलाई भ्रमण वर्षले केही राहत दिने अपेक्षा गरिएको छ । ५० हजारको सहभागितामा भ्रमण वर्षको उद्घाटन गर्ने भरतपुर महानगरको लक्ष्यलाई उल्लासमय उद्घाटनले पुष्टि गर्न सहयोग गरेको महानगर प्रमुख रेणु दाहालले बताइन् । कार्यक्रमको उद्घाटन पश्चात धन्यवाद ज्ञापन गर्न एक विज्ञप्ति प्रकाशित गरी प्रमुख दाहालले भरतपुर महानगरका सम्पूर्ण २९ वडाबाट हजारौँको सहभागी र शीर्ष नेताहरुको उपस्थितिले सबैमा सकारात्मक छाप छोडेको उल्लेख गरिएको छ । प्रमुख दाहालले अभूतपूर्व जनसागरको उपस्थितिले भरतपुर भ्रमण वर्षको औचित्य थप पुष्टि गरेको विज्ञप्तिमा उल्लेख गरेकी छन् ।

‘भ्रमण वर्षको उद्घाटनमा सोचेभन्दा बढी भरतपुरवासीको सहभागिताले बिहानीले दिनको संकेत गरे झैँ सानदार सुरूवातले आर्थिक गतिविधि चलायमान हुने देखिएको उल्लेख गरिएको छ ।’ प्रमुख दाहालका अनुसार वर्षभरि नै भ्रमणवर्षको उत्सव रहने अपेक्षा गरिएको छ । भ्रमण वर्षको लक्ष्य पूरा गर्न महानगरपालिकाभित्र राष्ट्रिय तथा अन्तर्राष्ट्रिय सभा सम्मेलन, गोष्ठी, सेमिनार जस्ता गतिविधिहरु सञ्चालन हुने छ । भ्रमण वर्षले महानरपालिकाको पर्यटकीय एवम् आर्थिक गतिविधिमा संख्यात्मक तथा गुणात्मक बढोत्तरी हुने आशा भरतपुर महानगरले गरेको छ । महानगर प्रमुख दाहालद्वारा जारी गरिएको विज्ञप्तिमा भ्रमण वर्षको अभियानलाई सफल बनाउन सबैको साथ, सहयोग र रचनात्मक सुझावको अपेक्षासमेत गरिएको छ ।