समाचार

फागुन २०, चितवन ।

मेघौली मध्यवर्ती सामुदायिक वन उपभोक्ता समूहले २५ वर्ष पूरा भएको अवसरमा रजत महोत्सवभएको छ  । २०५२ सालमा स्थापना भएको वनले आफ्नै वनक्षेत्रमा एक समारोहबीच रजत महोत्सव मनाउन लागेको हो । सामुदायिक वनले वैशाख ३ र ४ गते विभिन्न रचनात्मक तथा सृजनशील क्रियाकलापहरु गरेर रजत महोत्सव गर्ने उपभोक्ता समितिका अध्यक्ष मायाराम चौधरीले बताए । रजत महोत्सवको अवसरमा स्मारिका प्रकाशन गर्ने तयारी गरिएको बताउँदै उनले उक्त स्मारिकामा सामुदायिक वनमा विगत २५ वर्षमा भएका क्रियाकलापलाई समेट्ने बताए । उक्त अवसरमा केन्द्रीय सरकारका वनमन्त्रीलाई प्रमुखअतिथिको रुपमा निम्त्याउने तयारी गरिएको बताउँदै उनले भरतपुर महानगरपालिकाका मेयर, उपमेयर तथा चितवन राष्ट्रिय निकुञ्जका वार्डेनलगायतको उपस्थिति रहने बताए । महोत्सवमा समितिका पुर्व पदाधिकारीहरुलाई सम्मान गरिने भन्दै अध्यक्ष चौधरीले स्थानीय थारु, कुमाल, मगर तथा अन्य जातिहरुको परम्परागत संस्कृति प्रदर्शन महोत्सवको मुख्य आकर्षण रहने बताए । उनले समितिले मेघौली क्षेत्रभित्रका सामुदायिक वनहरुमा बासस्थान सुधार, पोखरी निर्माण, घाँसे मैदान व्यवस्थापन तथा द्वन्द्व न्यूनीकरणका लागि जनचेतना फैलाउने तथा मानव र वन्यजन्तुबीचको द्वन्द्व न्यूनीकरण गर्न मानव–वन्यजन्तु द्वन्द्व न्यूनीकरणलाई प्राथमिकतामा राखी काम गरेको बताए । संरक्षित क्षेत्रवरपर बढ्दो जनघनत्व, अव्यवस्थित भू–उपयोगका कारण बासस्थानमा भएको क्षयीकरण एवं सङ्कुचनले वन्यजन्तु बासस्थान छोडी गाउँबस्तीमा पस्ने गरेका कारण मानव–वन्यजन्तु द्वन्द्व बढ्दै गएको उनको भनाइ छ । चोरीसिकार नियन्त्रणमा युवा परिचालन अभियान, घाइते, अपाङ्ग, टुहुरा र समस्याग्रस्त वन्यजन्तुको व्यवस्थापनका लागि वन्यजन्तु उद्धार केन्द्र निर्माणका साथै मानव–वन्यजन्तु द्वन्द्व शून्य गर्न नसकिने भए पनि न्यूनीकरण गर्दै लैजानुपर्ने बताउँदै यो अभियानमा दृढ रहेको उनले बताए । मध्यवर्ती उपभोक्ता समूहबाट द्वन्द्व न्यूनीकरण र वन्यजन्तु संरक्षणका लागि जनचेतना फैलाउने काम भइरहेको उनले बताए । पछिल्लो समय चितवन राष्ट्रिय निकुञ्ज संरक्षणमा मध्यवर्ती क्षेत्र प्रभावकारी बनेको छ । चोरीसिकारको प्रवेश विन्दु मानिने मध्यवर्तीका बासिन्दा निकुञ्ज संरक्षणमा जुट्दै आएका छन् । २५ वर्षअघि सरकारले नियमावली बनाएर मध्यवर्तीको घोषणा गरेको हो । यससँगै स्थानीयको जीवनस्तर उकास्न राज्यले सहयोग गर्दै आएको छ भने स्थानीय त्यसको संरक्षणमा जुटेका छन् । २०५३ मङ्सिर १७ गते ‘मध्यवर्ती क्षेत्र व्यवस्थापन नियमावली’ राजपत्रमा प्रकाशित भएसँगै मध्यवर्तीको अवधारणा अघि बढेको हो । भरतपुर महानगरपालिका वडा नं–२७ र २८ मा पर्ने मेघौली क्षेत्रभित्रका नौवटा सामुदायिक वनहरुमा राधाकृष्ण, सदाबहार, हरियाली राप्ती तथा वेतरी, मालिका, राप्ती नियन्त्रित, नारायणी नियन्त्रित, बदार्हा–३, बदार्हा ४–६ र नकियादेवी सामुदायिक वन रहेका छन् । राप्ती र नारायणी नदीको सङ्गमस्थलसँगै चितवन राष्ट्रिय निकुञ्जको प्रवेशद्वार मेघौलीमा दुर्लभ वन्यजन्तु बाघ र गैँडा अवलोकनका लागि पर्यटक आउने गर्दछन् । हात्ती चढेर जंगल डुल्न चाहने पर्यटकहरु मध्यवर्ती सामुदायिक वनहरुमा जाने गर्छन् ।

भरतपुर, १९ फागुन ।
भरतपुर मेयर्स कप क्रिकेट प्रतियोगिताको रनिङ ट्रफी अर्किड स्कुलले हात परेको छ । शनिबार सम्पन्न फाइनल खेलमा वाल्मीकि शिक्षा सदनलाई २० रनले पराजित गर्दै अर्किड रनिङ ट्रफी हात पार्ने पहिलो टिमका रुपमा नाम लेखाउन सफल भएको हो । भरतपुर महानगरपालिकाले आयोजनामा माघ २६ गतेबाट सुरु भएको प्रतियोगितामा महानगरभित्रका १० सामुदायिक र १० संस्थागत विद्यालयका २० क्रिकेट टिम सामेल थिए । रामपुरमा निर्माणाधीन गौतम बुद्ध अन्तर्राष्ट्रिय क्रिकेट रंगशालाको नमुना खेल मैदानमा सञ्चालन भएको मेयर्स कपको फाइनल खेलमा टस जितेर अर्किडले ब्याटिङ रोजेको थियो । निर्धारित २० ओभर पूरै खेल्दै अर्किडले ६ विकेट गुमाएर १ सय ३० रन बनाएको थियो । १ सय ३१ रनको विजयी लक्ष्य पछ्याएको वाल्मीकि शिक्षा सदनले १९.१ ओभरमा सबै विकेट गुमाएर १ सय १० रनमात्रै जोड्न सक्यो ।अर्किडले एक्स्पर्ट एजुकेसन एण्ड भिजा सर्भिसेज चितवन प्रमुख प्रायोजक रहेको प्रतियोगिताको उपाधिमात्र जितेन विधागत पुरस्कारतर्फ पनि एकलौटी कब्जा गर्‍यो । फाइनल खेलमा बलिङमा २ विकेट लिएका र ब्याटिङमा ३६ रन लिएका अर्किडका मन्दिप बराल प्लेयर अफ द म्याच भए । उनै मन्दिप प्रतियोगिता अवधिभर २१ विकेट लिएका कारण बेस्ट बलर पनि भए ।त्यसैगरी अर्किडकै सगुन सापकोटा सर्वाधिक रन लिएका कारण बेस्ट ब्याटरमात्रै भएनन् प्रतियोगिताको प्लयर अफ दि सिरिज पनि छानिए । खेल अवधिभर उनले कुल २ सय ५७ रन जोडेका थिए । उनको नाममा १४ विकेट पनि रहयो । प्रतियोगिताका विजयी टिम र उत्कृष्ट खेलाडीहरुलाई भरतपुर महानगरपालिकाका मेयर रेनु दाहालले रनिङ ट्रफीका साथै प्रमणपत्र वितरण गरिन् । प्रतियोगिताका २० टिम सामेल गराएर नकआउट चरणबाट १० टिम लिग चरणका लागि छनौट भएका थिए । फागुन ४ गतेबाट प्रतियोगिताको लिग चरणका खेल सुरु भएका थिए । एक्स्पर्ट एजुकेसन एण्ड भिजा सर्भिसेज चितवनले लिग खेल्ने १० विद्यालयलाई जर्सी प्रदान गरेको थियो । त्यसैगरी एक्स्पर्टले प्रतियोगितामा सहभागी १० सामुदायिक विद्यालयलाई पनि क्रिकेट किट सहयोग गरेको थियो । एक्स्पर्टले विजेता टिमलाई ६० हजार रुपैयाँ र उपविजेता टिमलाई ३० हजार रुपैयाँ बराबरका क्रिकेट खेलकुद सामग्री पनि दिएको छ । प्रतियोगिताको सहआयोजकमा चितवन जिल्ला क्रिकेट संघ रहेको थियो । विद्यालयमा हुने खेलकुद गतिविधिले राष्ट्रिय अन्तर्राष्ट्रियस्तरका खेलाडी उत्पादन गर्न महत्वपूर्ण अवसर दिने भएकाले महानगरले क्रिकेटका साथै फुटबल प्रतियोगिता पनि गर्ने मेयर रेनु दाहालको भनाइ छ ।

फागुन २९, चितवन । तस्विर कोमल चन्द्र भगत । चितवनमा शनिबार आयोजना गरिएको रोटरी म्याराथुनको उपाधि त्रिभूवन आर्मी क्लवका मुकेश बहादुर पालले जितेका छन् । रोटरी क्लव अफ रत्ननगरले आयोजना गरेको खुल्ला तर्फको दौड निर्धारित दुरी ४६ मिटर ३८ सेकेण्डमा पार गर्दै पालले उपाधि जितेका हुन । खुल्ला तर्फ नारायणी नदी किनारबाट रत्ननगरको निपनी सम्म १५ दशमलब ४ किलोमिटरको दुरी कायम गरिएको थियो । महिला तर्फको म्याराधुनको उपाधि सशस्त्र प्रहरी बलकी फुलमति रानाले जितेकी छन् । निर्धारित दुरी १८ मिनेट १६ सेकेण्डमा पार गर्दै उनले उपाधि जितेकी हुन । महिला तर्फ टिकौली जंगलको बीच भागबाट निपनी सम्म ५ किलाेिमटर दुरी कायम गरिएको थियो । खुल्ला तर्फ त्रिभुवन आर्मीकै संजय श्रेष्ठ दितीय, जुम्लाका दुर्गाबहादुर बुढा तृतीय, त्रिभुवन आर्मीका टंक कार्की चौथौं, आर्मीकै सुवास कार्की पाँचौं, नेपाल प्रहरीका नागेश्वर अइर छैठौं, दाङका प्रेमबहादुर बस्नेत सातौं, सशस्त्र प्रहरीका राजेन्द्र तामाङ आठौं, सशस्त्रकै खिम बहादुर खत्री नवौं र स्याङजाका धनु मानन्धर दसौं भएका छन् ।

खुल्लातर्फ प्रथम पुरस्कार १ लाख नगदसहित चाँदीको तक्मा र प्रमाणपत्र, द्वितीय पुरस्कार ५० हजार नगदसहित चाँदीको तक्मा र प्रमाणपत्र, तृतीय पुरस्कार २५ हजार नगदसहित चाँदीको तक्मा र प्रमाणपत्र, चौथो पुरस्कार १० हजार नगदसहित प्रमाणपत्र, पाँचौँ पुरस्कार पाँच हजार नगदसहित प्रमाणपत्र, छैटौँदेखि दसौँ स्थानसम्म ३ हजारसहित प्रमाणपत्र र दूरी पूरा गर्ने चेपाङलाई दुई हजार नगद प्रदान गरिएको छ । महिला तर्फ सुनसरी रोकाया द्धितीय, आशा रावत तृतीय, सिमा चौधरी चौथो, समिता बुढा पाँचौ, अस्मिता भुजेल छैंठौं, नम्रता गुरूङ सातौं, वर्षा ओली आठौं, सन्ध्या अधिकारी नवौं र लक्षीमा डागी दसौं भएका छन् । महिलातर्फ प्रथम पुरस्कार २० हजार नगदसहित चाँदीको तक्मा एवं प्रमाणपत्र, द्वितीय पुरस्कार १० हजार नगदसहित चाँदीको तक्मा एवं प्रमाणपत्र, तृतीय पुरस्कार पाँच हजार नगदसहित चाँदीको तक्मा र प्रमाणपत्र, चौथो पुरस्कार तीन हजार नगदसहित प्रमाणपत्र, पाँचौँ पुरस्कार दुई हजार पाँच सय नगदसहित प्रमाणपत्र, छैटौँदेखि दसौँ स्थानसम्म दुई हजार नगदसहित प्रमाणपत्र र दूरी पूरा गर्ने चेपाङ महिलालाई एक हजार नगद प्रदान गरिएको छ । प्रतियोगितामा चेपाङ समुदायबाट १२२ जनाले सहभागिता जनाएका छन् । खुल्ला तर्फको प्रतियोगितामा सहभागी भएका चेपाङ समुदायका ६६ जना पुरुष मध्ये ३२ जनाले दुरी पार गरेको छन् भने महिला तर्फ सोही समुदायबाट ५६ जनाले सहभागिता जनाएका मध्ये १४ जनाले दुरी पार गरेको रोटरी क्लव अफ रत्ननगरका पूर्व अध्यक्ष तथा म्याराथुनका संयोजक विपिन पोखरेलले जानकारी दिए । खुल्ला तर्फको म्याराधुनको नारायणी नदी किनारका भरतपुर नगरपालिकाकी मेयर रेनु दाहालले र महिला तर्फको म्याराधुन टिकौलीमा रोटरीका डिष्ट्रिक गभर्नर राजेन्द्र प्रसाद ध्वजुले उद्घाटन गरेका थिए ।

दुबै विधाको प्रतियोगितामा ७६५ जनाले प्रतिस्पर्धा गरेका थिए । खुल्ला तर्फ ४९४ जना र महिला तर्फ २७१ जनाले प्रतियोगितामा सहभागिता जनाएको रोटरी क्लव अफ रत्ननगरका पूर्व अध्यक्ष तथा म्याराथुनका संयोजक विपिन पोखरेलले जानकारी दिए । खेलकुदको माध्यमबाट चितवनको पर्यटन विकास र प्रर्वधन गर्ने उद्देश्यले म्याराथुन प्रतियोगिता गरिएको उनले बताए । उद्घाटन कार्यक्रममा मेयर रेनु दाहालले भरतपुर भ्रमण बर्ष उत्सवको रुपमा मनाउने बताए । भ्रमण बर्षले जिल्लाको पर्यटन विकासमा योगदान गर्ने भन्दै उनले पर्यटक भित्र्याउन प्रर्वधनात्मक कार्यक्रम सञ्चालन गर्ने बताइन । निपनी स्थित होटल स्टार चितवनमा क्लवका अध्यक्ष हरिकुमार श्रेष्ठको अध्यक्षतामा भएको समापन कार्यक्रममा पुरस्कार, मेडल र प्रमाणपत्र प्रदान गरिएको थियो । समापन कार्यक्रमको प्रमुख अतिथि रोटरीका डिष्ट्रिक गभर्नर राजेन्द्र प्रसाद ध्वजु प्रमुख अतिथि रहेका थिए ।