समाचार

चितवन, असार २ । भरतपुर महानगरपालिकाले आर्थिक वर्ष ०८०र०८१ मा ४ हजार ५ सय २४ जनालाई निःशुल्क तालिम दिएको छ ।
उत्पादनलाई प्राथमिकता दिदै आइरहेको महानगरले वडा र महानगरस्तरीय गरी यस आर्थिक वर्षमा विभिन्न प्रकारको स्वरोजगार सम्बन्धी तालिम दिएको हो ।
महानगरको रोजगारी शाखाका अनुसार ब्युटी पार्लर, बालबालिकाको क्षमता वृद्धि, महिलाहरुको आन्तरिक क्षमता वृद्धि, बुटिक र पोते बनाउने, कौशी खेती, पञ्चेबाज बजाउने, मादल तथा खैजडीमा खरी भर्ने, मन्टेश्वरी, झोला, जुत्ता तथा चप्पल बनाउने, अचार बनाउने तालिम दिएको छ ।
यस्तै प्लम्बिङ, कृषि, बेकरी, सरफ, साबुन, भाडा धुने झोल र फिनेल बनाउने, घरेलु फोहोर व्यवस्थापन, चित्रकला, कपाल काट्ने, अमिन, झुम्का, माला, नेक्लेश तथा चुरा बनाउने, ड्राईभिङ,एड्भान्स सिलाई कटाई, कुक र होमेस्टे, इलेक्ट्रिसियन, सेनेटरी प्याड बनाउनेलगायतका तालिम हो ।
तालिमहरु एक दिने देखि ४ महिनासम्म सञ्चालन भएको महानगरले जनाएको छ । श्रमलाई उत्पादनसँग’ जोडेर सीप नहुनेलाई सीपयुक्त बनाउनु, सीप भएकालाई रोजगार तथा स्वरोजगार बनाउनु, रोजगारमा भएका तर सीप नभएकाहरूको व्यावसायिक स्तर वृद्धि गराएर आयमा वृद्धि गराउनु तालिम सञ्चालनको मुख्य उद्देश्य रहेको महानगरले जनाएको छ । भरतपुर महानगरपालिका प्रमुख रेनु दाहालले भरतपुरमा पूर्वाधारको विकाससँगै विभिन्न परियोजनामा दक्ष जनशक्तिको माग भएकाले निःशुल्क तालिमलाई जोड दिइएको बताउनुभयो । अहिले यहाँका उद्योग, कलकारखाना लगायतका ठाँउमा भारतलगायत अन्य देशबाट दक्ष नागरिक ल्याउनुपर्ने बाध्यता रहेको उहाँले बताउनुभयो । तालिमको व्यवस्था गरिने युवाहरूलाई स्वरोजगार बनाई स्वदेशमै बस्ने वातावरण तयार गर्ने महानगरको उद्देश्य रहेको प्रमुख दाहालको भनाइ रहेको छ । महानगरले आगामी आर्थिक वर्षमा निःशुल्क तालिम दिने कार्यक्रमलाई वृद्धि गर्दै लैजाने पनि जनाएको छ ।

चितवन, जेठ ३० । तस्विर कोमल चन्द्र भगत । 

चितवनको भरतपुरमा जिवित पशुपन्छी ढुवानी विरुद्धको दिवश मनाइने भएको छ । एनिमल नेपालको आयोजनामा यही जेठ ३२ गते विभिन्न कार्यक्रम गरी दिवश मनाउन लागिएको बुधबार भरतपुरमा पत्रकार सम्मेलनको आयोजना गरि जानकारी दिइएको छ ।

नेपालको कानुनमा उल्लेखित पशु निर्देशिका पालनाको दबाब स्वरुप भरतपुरको चौविसकोठीमा कालोपट्टी बाधेर विरोध जनाउनुको साथै सांस्कृतिक कार्यक्रम समेत गरिने एनिमल नेपाल फिल्ड कार्यालय चितवनका रामचन्द्र आचार्यले जानकारी दिनुभयो । आचार्यका अनुसार ढुवानीको क्रममा पशुलाई शारीरिक तथा मानसिक रुपमा चरम यातना दिने गरिएको छ । सुदुरपश्चिमको महेन्द्रनगरबाट राजधानीसम्म ढुवानी गर्दा पशुलाई विश्राम गर्न नदिई यात्रा गराउने गरिएको उहाँले बताउनुभयो । पशु ढुवानी निर्देशिकामा आठ घण्टाको यात्रापछि पशुलाई ओरालेर दानापानी दिनुपर्ने विषय उल्लेख गरिएको छ । तर, २४ घण्टासम्म पनि निरन्तर यात्रा गराउने गरिएको आचार्यको जिकिर छ । पशु क्वारेन्टाइनका कर्मचारीले समेत पशु ढुवानी निर्देशिकालाई कार्यान्वयन नगरेको उहाँले बताउनुभयो । व्यवसायीको निर्देशनमा कर्मचारी लागेको उहाँको आरोप छ ।

जेठ २७, चितवन । नेपाल फलफूल तथा तरकारी व्यवसायी महासंघको अध्यक्ष भरतप्रसाद खतिवडा निर्विरोध निर्वाचित भएका छन् ।

महासंघको सातौं वार्षिक साधारण सभा तथा चौथो अधिवेशनले अध्यक्ष खतिवडासहितको सत्र सदस्यीय कार्यसमिति चयन गरेको हो । अधिवेशनबाट उपाध्यक्षहरु मुकुन्दप्रसाद गौतम, कृष्णप्रसाद संजेल, गिरिजापति गुप्ता, निर्मलप्रसाद बाँस्तोला, उमाकान्त ढुंगेल, बाबुराम भुषाल, महासचिवमा विनोदराज पाण्डे, सचिवमा कृष्णप्रसाद हुमागाई, सहसचिवमा सूर्यबहादुर भण्डारी र कोषाध्यक्षमा दिपक गिरी चयन भएका छन् । यस्तैगरी सदस्यहरुमा पदमबहादुर थापा, हरिशरण अधिकारी, मोहम्मत याकुव, रतन महतरा, अमृतबाबु भट्टराई, रामप्रसाद कंडेल निर्वाचित भएका हुन् । त्यस्तै, गण्डकी प्रदेश संयोजकमा राजेन्द्र गिरी, कोशी प्रदेश संयोजकमा खगेन्द्र महतो, सुदूरपश्चिम प्रदेश संयोजकमा हरिदत्त भट्ट, कर्णाली प्रदेश संयोजकमा कलबहादुर महतरा, बागमती प्रदेश संयोजकमा काशीराम सापकोटा, लुम्बिनी प्रदेश संयोजकमा अमृतबाबु भट्टराईलाई चयन गरिएको छ ।